રોહિત શર્મા બોક્સિંગ ડે ટેસ્ટમાં ઓપનિંગ કરી શકે:રાહુલ નંબર 3 પર રમશે, રોહિતે કહ્યું હતું- અમે ટીમ માટે જે શ્રેષ્ઠ હશે તે કરીશું

ભારતીય કેપ્ટન રોહિત શર્મા મેલબોર્ન ટેસ્ટમાં યશસ્વી જયસ્વાલ સાથે ઓપનિંગ કરી શકે છે. જ્યારે કેએલ રાહુલને નંબર-3 પર ઉતારવામાં આવી શકે છે. એટલું જ નહીં ભારતીય ટીમ બોક્સિંગ-ડે ટેસ્ટમાં 2 સ્પિનરો સાથે ઉતરી શકે છે. નીતિશ રેડ્ડીને પડતા મૂકવામાં આવી શકે છે. ટાઈમ્સ ઓફ ઈન્ડિયાએ પોતાના અહેવાલમાં આ દાવો કર્યો છે. એક દિવસ પહેલા રોહિત શર્માએ તેના બેટિંગ ઓર્ડર પર સસ્પેન્સ જાળવી રાખ્યું હતું. તેણે કહ્યું હતું- ‘કોણ ક્યાં બેટિંગ કરશે તેની ચિંતા ન કરો. આપણે આ વિશે વિચારવાની જરૂર છે અને તે એવી વસ્તુ નથી જેની હું અહીં ચર્ચા કરું છું. અમે ટીમ માટે જે શ્રેષ્ઠ હશે તે કરીશું.’ બોર્ડર-ગાવસ્કર ટ્રોફી (BGT)ની ચોથી મેચ 26 ડિસેમ્બરથી મેલબોર્નના MCG મેદાન પર રમાશે. રોહિત 5 ટેસ્ટ સિરીઝની પ્રથમ મેચ રમ્યો ન હતો, ઓપનિંગમાં તેના સ્થાને કેએલ રાહુલ આવ્યો હતો. આ પછી, બે ટેસ્ટમાં રાહુલે ઓપનિંગ કર્યું અને રોહિત છઠ્ઠા નંબર પર આવ્યો, પરંતુ તે માત્ર 19 રન બનાવી શક્યો. રોહિત છેલ્લી 2 મેચમાં નંબર-6 પર ઉતર્યો, માત્ર 19 રન બનાવી શક્યો
રોહિત શર્મા પોતાના બીજા બાળકના જન્મને કારણે પ્રથમ ટેસ્ટ મેચ રમી શક્યો ન હતો. તે બીજી ટેસ્ટમાં ઓપનર તરીકે પરત ફરવાનો હતો, પરંતુ કેએલ રાહુલે પર્થમાં 77 રનની શાનદાર ઇનિંગ રમીને ભારતની જીતમાં મહત્વની ભૂમિકા ભજવી હતી. આવી સ્થિતિમાં કેપ્ટને પોતાનો બેટિંગ ઓર્ડર બદલવો પડ્યો. જોકે, તે ત્રણ ઇનિંગ્સમાં માત્ર 19 રન જ બનાવી શક્યો હતો. બીજી તરફ, રાહુલે ત્રીજી ટેસ્ટ મેચની પ્રથમ ઇનિંગમાં 84 રન બનાવીને ટોપ ઓર્ડરમાં પોતાનો દાવો મજબૂત કર્યો હતો. BGT 1-1ની બરાબરી પર, ગાબા ટેસ્ટ ડ્રો
ભારતીય ટીમ હાલ મેલબોર્નમાં છે. ટીમ ઈન્ડિયાને 26 ડિસેમ્બરથી ઓસ્ટ્રેલિયા સાથે બોર્ડર-ગાવસ્કર ટ્રોફીની ચોથી મેચ રમવાની છે. 5 મેચની સિરીઝ 1-1 થી બરાબર છે. ભારતે 18 ડિસેમ્બરે ગાબા ટેસ્ટ ડ્રો કરી હતી. ભારતે પર્થમાં પ્રથમ મેચ 295 રનથી જીતી હતી, જ્યારે એડિલેડમાં રમાયેલી પિંક બોલ ટેસ્ટમાં યજમાન ટીમે 10 વિકેટે જીત મેળવી હતી.