ભારતે સોમવારે બાંગ્લાદેશના ડેપ્યુટી હાઈ કમિશનર નુરુલ ઈસ્લામને ભારત-બાંગ્લાદેશ સરહદ પર ફેન્સિંગના વિવાદને લઈને સમન્સ પાઠવ્યું હતું. આ પહેલા રવિવારે બાંગ્લાદેશે ભારતીય હાઈ કમિશનરને સમન્સ પાઠવ્યું હતું. બાંગ્લાદેશના વિદેશ મંત્રાલયે ભારતીય હાઈ કમિશનર પ્રણય વર્માને બોલાવીને સરહદ પર BSF દ્વારા કરવામાં આવી રહેલી ફેન્સિંગને ગેરકાયદેસર પ્રયાસ ગણાવ્યો હતો. બાંગ્લાદેશનો આરોપ છે કે ભારત સરહદ પર દ્વિપક્ષીય કરારનું ઉલ્લંઘન કરીને સરહદ પર પાંચ સ્થળોએ ફેન્સિંગ લગાવવાનો પ્રયાસ કરી રહ્યું છે. બાંગ્લાદેશની સરકારી સમાચાર એજન્સી BSSએ જણાવ્યું કે ભારતીય હાઈ કમિશનરે બાંગ્લાદેશના વિદેશ સચિવ જશીમુદ્દીન સાથે લગભગ 45 મિનિટ સુધી આ મુદ્દે વાત કરી. જોકે, બાંગ્લાદેશની વચગાળાની સરકારે આ મામલે કોઈ નિવેદન જારી કર્યું નથી. ભારતીય ઉચ્ચાયુક્તે બેઠક બાદ કહ્યું કે બંને દેશો સુરક્ષાના મુદ્દે ફેન્સિંગ બાંધવા માટે સંમત થયા છે. બંને દેશોના સુરક્ષા દળો (BSF અને BGB)એ પણ આ મુદ્દે વાત કરી છે. બાંગ્લાદેશના ગૃહમંત્રીએ વિરોધ વ્યક્ત કર્યો
રવિવારે બાંગ્લાદેશના ગૃહ મામલાના સલાહકાર જહાંગીર આલમ ચૌધરીએ કહ્યું હતું કે બાંગ્લાદેશ તેની સરહદ પર કોઈને સ્થાન નહીં આપે. તેમણે કહ્યું કે સરહદ પર ઝીરો લાઇનના 150 યાર્ડની અંદર સંરક્ષણ સંબંધિત કોઈ પણ કાર્યને મંજૂરી આપવામાં આવશે નહીં. જહાંગીર આલમના જણાવ્યા અનુસાર, બાંગ્લાદેશ અને ભારત વચ્ચે થયેલા કરાર ‘બાંગ્લાદેશ-ભારત જોઈન્ટ બોર્ડર ડાયરેક્ટિવ-1975’ અનુસાર, બંને દેશોની શૂન્ય રેખાના 150 યાર્ડની અંદર સંરક્ષણ સંબંધિત કોઈપણ પ્રકારની કામગીરી કરવા પર પ્રતિબંધ છે. આ માટે બંને દેશોની સહમતિ જરૂરી છે. ભારત અને બાંગ્લાદેશ વચ્ચે 4,156 કિમીની સરહદ છે. તેમાંથી ભારતે 3271 કિલોમીટરની ફેન્સિંગ કરી છે, પરંતુ 885 કિલોમીટરની સરહદ પર આ કામ બાકી છે. 5 જગ્યાએ ફેન્સિંગને લઈને વિવાદ
જહાંગીર આલમ ચૌધરીએ કહ્યું કે ભારતે 2010થી 2023 દરમિયાન 160 સ્થળોએ ફેન્સીંગનું કામ કર્યું છે. BSFએ 10 જાન્યુઆરીથી ફરી આ કામ શરૂ કર્યું, જેમાં 5 જગ્યાએ વિવાદ શરૂ થયો. આ વિવાદ ચાપૈનવાબગંજ, લાલમોનીરહાટમાં તીન બીઘા કોરિડોર, નૌગાંવના પટનીતલા, ફેની, કુશ્ટિયા અને કુમિલામાં થયો હતો. આલમના કહેવા પ્રમાણે, બાંગ્લાદેશના વાંધા બાદ BSFએ ફેન્સિંગનું કામ બંધ કરી દીધું છે. BSFએ બાંગ્લાદેશને ખાતરી આપી હતી કે તે કાંટાળા તાર વડે ફેન્સિંગનું કામ બંધ કરશે. ભારતે શેખ હસીનાના વિઝા લંબાવ્યા
બંને દેશો વચ્ચે ચાલી રહેલા વિવાદ વચ્ચે ભારતે બાંગ્લાદેશના પૂર્વ વડાપ્રધાન શેખ હસીનાના વિઝાની મુદત 4 દિવસ પહેલા જ વધારી દીધી છે. બીજી તરફ બાંગ્લાદેશે શેખ હસીનાનો પાસપોર્ટ રદ કરી દીધો છે. ગયા વર્ષે જુલાઈમાં થયેલી હિંસાના સંબંધમાં હસીના સહિત 97 લોકોના પાસપોર્ટ રદ કરવામાં આવ્યા હતા
‘વાડ’ વિવાદ અને સમન્સ:ભારતની ફેન્સિંગને ગેરકાયદે ગણાવતા બાંગ્લાદેશના ડે. હાઇકમિશનરને સમન્સ, ગઈકાલે બાંગ્લાદેશે ભારતીય હાઇકમિશનરને સમન્સ પાઠવેલું
