યુરોપ જઈ રહેલા 44 પાકિસ્તાનીના દરિયામાં ડૂબી જતા મોત:મોરોક્કો પાસે એટલાન્ટિક મહાસાગરમાં બોટ પલટી ગઈ; ગેરકાયદેસર રીતે સ્પેન જઈ રહ્યા હતા

ગેરકાયદે રીતે યુરોપ જઈ રહેલા 44 પાકિસ્તાની નાગરિકોના એટલાન્ટિક મહાસાગરમાં ડૂબી જવાથી મોત થયા છે. પાકિસ્તાની વેબસાઈટ ડોન અનુસાર પશ્ચિમ આફ્રિકાથી સ્પેન જઈ રહેલી એક બોટ મોરોક્કોના દખલા પોર્ટ નજીક ડૂબી ગઈ હતી. બોટમાં 80થી વધુ લોકો સવાર હતા. આમાં 50થી વધુ લોકોના મોત થયા હતા, જેમાં મોટા ભાગના પાકિસ્તાની હતા. રિપોર્ટ અનુસાર લોકોને લઈને જતું જહાજ યાત્રા દરમિયાન ગુમ થઈ ગયું હતું. તેને શોધવાનો પ્રયાસ કરવામાં આવ્યો હતો પરંતુ તે મળ્યું નહોતું. પાકિસ્તાનના રાષ્ટ્રપતિ આસિફ અલી ઝરદારીએ આ દુર્ઘટના પર દુઃખ વ્યક્ત કર્યું છે અને માનવ તસ્કરી રોકવા માટે પગલાં ભરવાની વાત કરી છે. આ દરમિયાન, વડાપ્રધાન શેહબાઝ શરીફે અધિકારીઓ પાસેથી ઘટના અંગે અહેવાલ માંગ્યો હતો અને કહ્યું હતું કે માનવ તસ્કરીના ઘૃણાસ્પદ કૃત્યમાં સામેલ લોકો સામે કડક કાર્યવાહી કરવામાં આવશે. એક દિવસ પહેલા પણ બોટ ડૂબી જતાં 36 લોકોને બચાવી લેવાયા હતા પાકિસ્તાનના વિદેશ મંત્રાલયે એક નિવેદનમાં કહ્યું કે મોરોક્કોમાં તેનું દૂતાવાસ સ્થાનિક અધિકારીઓના સંપર્કમાં છે. મંત્રાલયે એક નિવેદનમાં જણાવ્યું હતું કે, ‘રાબત (મોરોક્કો)માં અમારા દૂતાવાસે અમને જાણ કરી છે કે મોરેટાનિયાથી રવાના થયેલા ઘણા પાકિસ્તાની નાગરિકો સહિત 80 મુસાફરોને લઈને એક બોટ મોરોક્કોના દખલા બંદર નજીક પલટી ગઈ હતી. પાકિસ્તાનીઓ સહિત ઘણા બચી ગયેલા લોકો દખલા પાસેના કેમ્પમાં રોકાયા છે. બોટ પલટી જવાની ઘટનાના એક દિવસ પહેલા પણ આવો જ અકસ્માત જોવા મળ્યો હતો. મોરોક્કન સત્તાવાળાઓએ એક દિવસ પહેલા જ બોટમાંથી 36 લોકોને બચાવ્યા હતા. આ બોટ મોરેશિયસથી 2 જાન્યુઆરીએ 86 પ્રવાસીઓ સાથે રવાના થઈ હતી. આ પ્રવાસીઓમાં 66 પાકિસ્તાની પણ સામેલ હતા. વોકિંગ બોર્ડર્સના CEOએ સોશિયલ મીડિયા પર માહિતી આપી છે કે ડૂબી ગયેલા લોકોમાંથી 44 લોકો પાકિસ્તાનના હતા. 2024માં યુરોપ જતી વખતે 10 હજારથી વધુ લોકોના મોત
દર વર્ષે લાખો પાકિસ્તાનીઓ વધુ સારા જીવનની શોધમાં યુરોપ જાય છે. આમાંના મોટાભાગના લોકો ગેરકાયદેસર રીતે ઘુસવાના પ્રયાસ કરે છે. પ્રવાસીઓ પર કામ કરતી ફ્રોન્ટેક્સ એજન્સી અનુસાર, ગયા વર્ષે 2.4 લાખથી વધુ લોકો કોઈપણ દસ્તાવેજો વિના યુરોપમાં ઘુસવામાં સફળ રહ્યા હતા. અન્ય એજન્સી, વૉકિંગ બોર્ડર્સે જણાવ્યું હતું કે 2024માં સ્પેનમાં ઘુસવાનો પ્રયાસ કરતા 10,457 લોકોના મૃત્યુ થવાની ધારણા છે. તેમાંથી મોટાભાગના લોકો મોરેટાનિયા અને સેનેગલ જેવા પશ્ચિમ આફ્રિકન દેશોથી સ્પેનના કેનેરી ટાપુઓની મુસાફરી દરમિયાન મૃત્યુ પામ્યા હતા.