દેશના 7 રાજ્યોમાં આજે ગાઢ ધુમ્મસનું એલર્ટ જાહેર કરવામાં આવ્યું છે. પંજાબ, હરિયાણા, રાજસ્થાન, ઉત્તરાખંડ, ઉત્તર પ્રદેશ, હિમાચલ પ્રદેશ અને મધ્ય પ્રદેશમાં ધુમ્મસને કારણે વિઝિબિલિટી ઘટી ગઈ છે. યુપીના ઘણા જિલ્લાઓમાં વિઝિબિલિટી ઘટીને 50 મીટર થઈ ગઈ હતી. ધુમ્મસના કારણે કાનપુરમાં 36 અને આગ્રામાં 10 ટ્રેનો મોડી પડી હતી. અહીં ઠંડીના કારણે કાનપુર, મેરઠ, આગ્રા અને વારાણસીમાં ધોરણ-8 સુધીની સ્કૂલો બંધ રાખવામાં આવી હતી. આ તરફ રાજસ્થાનમાં તાપમાનમાં સતત ઘટાડો થઈ રહ્યો છે. હિલ સ્ટેશન માઉન્ટ આબુમાં લઘુત્તમ તાપમાન 0.8 ડિગ્રીએ પહોંચી ગયું છે. બીજી તરફ, એમપીના 18 શહેરોમાં કોલ્ડ વેવની સ્થિતિ જોવા મળી હતી. હવામાન વિભાગે કહ્યું છે કે દેશના ઉત્તરના 4 રાજ્યો (જમ્મુ-કાશ્મીર, લદ્દાખ, હિમાચલ પ્રદેશ અને ઉત્તરાખંડ)માં હિમવર્ષાના કારણે પંજાબ, હરિયાણા અને ઉત્તર પ્રદેશમાં પણ તાપમાન ગગડી રહ્યું છે. હિમાચલના ઘણા જિલ્લામાં ભારે હિમવર્ષાના કારણે ઘણા રસ્તાઓ બંધ છે. પ્રશાસન દ્વારા નેશનલ હાઈવે 3 અને નેશનલ હાઈવે 305 બંધ કરી દેવામાં આવ્યો છે. અહીંના 10 શહેરોમાં તાપમાન માઈનસ સુધી પહોંચી ગયું છે. કુકુમસેરીમાં લઘુત્તમ તાપમાન માઈનસ 12 ડિગ્રી નોંધાયું હતું. દેશભરના હવામાનની તસવીરો… કાશ્મીરમાં તાપમાન માઈનસ 11.8 ડિગ્રીએ પહોંચ્યું છે કાશ્મીરના ઉચ્ચ વિસ્તારો અને ખીણના કેટલાક મેદાનોમાં હિમવર્ષા ચાલુ છે. જેના કારણે રાત્રિના તાપમાનમાં સતત ઘટાડો થઈ રહ્યો છે. કાશ્મીરના ગુલમર્ગનું લઘુત્તમ તાપમાન -7 ડિગ્રી સેલ્સિયસ નોંધાયું હતું. તેમજ, પહેલગામ -11.8 ડિગ્રી સેલ્સિયસ તાપમાન સાથે કાશ્મીરમાં સૌથી ઠંડું હતું. આગામી 2 દિવસ માટે હવામાનની આગાહી… 19 જાન્યુઆરી: 12 રાજ્યોમાં ધુમ્મસનું એલર્ટ 20 જાન્યુઆરી: MP સહિત 5 રાજ્યોમાં વરસાદ પડશે રાજ્યોમાં હવામાનની સ્થિતિ… મધ્યપ્રદેશ: ગ્વાલિયર-ચંબલમાં ધુમ્મસ, ભોપાલ-ઈન્દોરમાં વાદળો છવાયા, મધ્યપ્રદેશમાં 2 દિવસ હવામાન બદલાયેલું રહેશે મધ્યપ્રદેશના ગ્વાલિયર-ચંબલમાં આગામી 2 દિવસ સુધી ધુમ્મસ રહેશે જ્યારે ભોપાલ, ઈન્દોર-ઉજ્જૈનમાં વાદળછાયું વાતાવરણ રહેશે. હવામાન વિભાગના જણાવ્યા અનુસાર 19-20 જાન્યુઆરી દરમિયાન ઠંડીની અસર ફરી વધશે. આ વખતે જાન્યુઆરીના અંતિમ સપ્તાહમાં પણ તીવ્ર ઠંડી પડવાની સંભાવના છે. હરિયાણાઃ 5 જિલ્લામાં ગાઢ ધુમ્મસ, 21-22 જાન્યુઆરીએ વરસાદની શક્યતા હરિયાણામાં આજે ઘણી જગ્યાએ ધુમ્મસ છે. હિસાર, રેવાડી, નારનોલ, ઝજ્જર અને ચરખી દાદરી ગાઢ ધુમ્મસ છવાયું છે. હિસારમાં વિઝિબિલિટી શૂન્ય છે. હવામાન વિભાગે આગામી 3 કલાક માટે ભિવાની, ફતેહાબાદ, સિરસા અને સોનીપતમાં ગાઢ ધુમ્મસનું એલર્ટ જાહેર કર્યું છે. હિમાચલ પ્રદેશ: હિમવર્ષા બાદ તાપમાનમાં ઘટાડો, સિઓબાગમાં 24 કલાકમાં પારો 11 ડિગ્રી ગગડ્યો હિમાચલ પ્રદેશના ઊંચા વિસ્તારોમાં વરસાદ અને હિમવર્ષા બાદ આજે વેસ્ટર્ન ડિસ્ટર્બન્સ (WD) નબળું પડી ગયું છે. જેના કારણે આજે રાજ્યના મોટાભાગના વિસ્તારોમાં હવામાન ચોખ્ખું થઈ ગયું છે. આજે કેટલાક વિસ્તારોમાં હળવા વરસાદ અને હિમવર્ષાની આગાહી કરવામાં આવી છે.
