પાકિસ્તાને મુલતાન ટેસ્ટ 127 રને જીતી:વેસ્ટ ઈન્ડિઝ બીજો દાવમાં 123 રનમાં ઓલઆઉટ; મેચમાં સાજિદ ખાને 9 વિકેટ ઝડપી

પાકિસ્તાને 2 મેચની ટેસ્ટ સિરીઝની પ્રથમ મેચમાં વેસ્ટ ઈન્ડિઝને 127 રનથી હરાવ્યું હતું. મુલતાનની સ્પિન ફ્રેન્ડલી વિકેટ પર તે લો સ્કોરિંગ મેચ હતી. રવિવારે ત્રીજા દિવસે 251 રનના જવાબમાં વેસ્ટ ઈન્ડિઝનો બીજો દાવ 123 રનમાં સમેટાઈ ગયો હતો. પ્લેયર ઓફ ધ મેચ બનેલા સાજીદ ખાને કુલ 9 વિકેટ લીધી હતી. પ્રથમ દાવમાં 4 અને બીજી ઈનિંગમાં 5 વિકેટ ઝડપી હતી. 6 કેરેબિયન બેટર બીજી ઇનિંગમાં ડબલ ફિગરને સ્પર્શી શક્યા ન હતા. આ પહેલા પાકિસ્તાની ઈનિંગ્સ 157 રનમાં સમેટાઈ ગઈ હતી. પ્રથમ દાવમાં 93 રનની લીડ સાથે ટીમે વેસ્ટ ઈન્ડિઝને 251 રનનો ટાર્ગેટ આપ્યો હતો. ટીમ તરફથી જોમેલ વોરિકને 7 વિકેટ ઝડપી હતી. મેચના બીજા દિવસે પાકિસ્તાન તેની પ્રથમ ઇનિંગમાં 230 રન બનાવી શક્યું હતું. જ્યારે વેસ્ટ ઈન્ડિઝની ટીમ 137 રનમાં ઓલઆઉટ થઈ ગઈ હતી. જેમાં પાકિસ્તાન તરફથી સ્પિનર ​​નોમાન અલીએ 5 વિકેટ લીધી હતી. શ્રેણીની બીજી મેચ 25 જાન્યુઆરીથી મુલતાનમાં રમાશે. સાજિદે 5 વિકેટ લીધી, અબરારની 4 વિકેટ
વેસ્ટ ઈન્ડિઝની બીજી ઇનિંગમાં બેટર્સ સ્પિનરો સામે ટકી શક્યો નહોતો. ટીમ તરફથી અલીક એથેનાઝે સૌથી વધુ 55 રન બનાવ્યા હતા. કેરેબિયન ટીમ ઇનિંગ્સમાં માત્ર 36.3 ઓવર જ રમી શકી હતી. સાજિદ ખાને 15 ઓવરમાં 50 રન આપીને 5 વિકેટ લીધી હતી. લેગ સ્પિનર ​​અબરાર અહેમદે 4 વિકેટ લીધી હતી. નોમાન અલીને 1 વિકેટ મળી હતી. શકીલ-રિઝવાને ફિફ્ટી ફટકારી
પાકિસ્તાને બીજા દિવસે 143/4ના સ્કોરથી રમવાનું શરૂ કર્યું હતું. સઈદ શકીલે 56 અને મોહમ્મદ રિઝવાને 51 રનના સ્કોર સાથે પોતાની ઈનિંગ આગળ ધપાવી હતી. બંનેએ 141 રનની ભાગીદારી કરી અને સ્કોર 200ની નજીક પહોંચાડ્યો. શકીલ 84 રન અને રિઝવાન 71 રન બનાવીને આઉટ થયા હતા. 187 રનમાં 5 વિકેટ ગુમાવ્યા બાદ પાકિસ્તાને આગળની 5 વિકેટ ગુમાવીને 43 રન બનાવ્યા હતા. વેસ્ટ ઈન્ડિઝ તરફથી સ્પિનર ​​જોમેલ વોરિકન અને ફાસ્ટ બોલર જેડન સીલ્સે 3-3 વિકેટ લીધી હતી. કેવિન સિંકલેરને 2 અને ગુડાકેશ મોતીને 1 વિકેટ મળી હતી. એક બેટર રનઆઉટ થયો હતો. બોલરોએ વેસ્ટ ઈન્ડિઝને 100 રનથી આગળ લઈ ગયા
વેસ્ટ ઈન્ડિઝના બેટર્સ પ્રથમ દાવમાં માત્ર 25.2 ઓવર જ બેટિંગ કરી શક્યા હતા. ટોપ-7માં માત્ર કેપ્ટન ક્રેગ બ્રેથવેટ 11 રન સુધી પહોંચી શક્યો હતો, બાકીના 6 બેટર્સ 7 રનના આંકડાને પણ સ્પર્શી શક્યા ન હતા. ટીમે 66 રનના સ્કોર પર 8 વિકેટ ગુમાવી દીધી હતી. બોલરોએ ફરી વેસ્ટ ઈન્ડિઝને 100 રનથી આગળ લઈ ગયા. સિંકલેરે 11 રન, મોતી 19, વોરિકન 31 અને સીલ્સે 22 રન બનાવ્યા હતા અને ટીમનો સ્કોર 137 રન સુધી પહોંચાડ્યો હતો. પાકિસ્તાન તરફથી નોમાન અલીએ 5 અને સાજિદ ખાને 4 વિકેટ ઝડપી હતી. અબરાર અહેમદને પણ 1 સફળતા મળી. બાબર બીજા દાવમાં પણ નિષ્ફળ રહ્યો
મેચના બીજા દિવસે પાકિસ્તાને પણ પોતાની ઇનિંગની શરૂઆત કરી હતી. ટીમના કેપ્ટન શાન મસૂદ અને મોહમ્મદ હુરૈરાએ 67 રનની ઓપનિંગ ભાગીદારી કરી હતી. હુરૈરા 29 રન બનાવીને આઉટ થયો હતો. બાબર આઝમ બીજી ઇનિંગમાં પણ ફ્લોપ રહ્યો હતો, તે માત્ર 5 રન બનાવીને આઉટ થયો હતો. તેણે પ્રથમ દાવમાં 8 રન બનાવ્યા હતા. જોમેલ વોરિકને બંને વિકેટ લીધી હતી. કેપ્ટન મસૂદ સેટ હતો, પરંતુ 52 રન બનાવીને રનઆઉટ થયો હતો. ટીમે 106 રનના સ્કોર પર ત્રીજી વિકેટ ગુમાવી હતી. દિવસની રમતના અંત સુધી કામરાન ગુલામ 9 રન બનાવીને અણનમ રહ્યા હતા અને સઈદ શકીલ 2 રન બનાવીને નોટઆઉટ રહ્યા હતા. 109 રન બનાવીને પાકિસ્તાને બીજી ઈનિંગમાં 202 રનની લીડ મેળવી લીધી છે. પ્રથમ દિવસે વરસાદ નડ્યો હતો
શુક્રવારે પાકિસ્તાને ટોસ જીતીને બેટિંગ કરવાનું પસંદ કર્યું હતું. વરસાદના કારણે માત્ર 41.3 ઓવર જ રમાઈ શકી હતી. હોમ ટીમે 4 વિકેટ ગુમાવીને 143 રન બનાવ્યા હતા. ટોપ-4 બેટર્સ કંઈ ખાસ કરી શક્યા ન હતા. સઈદ શકીલ અને મોહમ્મદ રિઝવાને અડધી સદી ફટકારીને ટીમને સારી સ્થિતિમાં પહોંચાડી દીધું હતું.