જૂની દાઝ રાખી લિસ્ટેડ બૂટલેગરે હેડ કોન્સ્ટેબલને ઉડાવ્યો, CCTV:પહેલા રાઉન્ડમાં ટક્કર ન લાગી તો યુ-ટર્ન લઈ ફરી આવ્યો ને ટક્કર મારી, પકડીને પોલીસ સ્ટેશન લાવ્યા તો PSOને લાફો માર્યો

સુરતની અઠવા લાઈન્સ પોલીસ મળસ્કે નાનપુરા ટીમલિયાવાડ ત્રણ રસ્તા પાસે વાહન ચેકિંગ કરતી હતી. ત્યારે અઠવાગેટ તરફથી કારમાં આવતા નાનપુરાના વોન્ટેડ બૂટલેગરે હેડ કોન્સ્ટેબલને ઉડાવતા તેને ઈજા થઈ હતી. બૂટલેગરથી પહેલા રાઉન્ડમાં ટક્કર ના વાગી તો યુ-ટર્ન લઈ ફરી આવ્યો અને હેડ કોન્સ્ટેબલને ઉડાવ્યો. આરોપી સામે પોલીસ કર્મચારીની હત્યાની કોશિશ અને ફરજમાં રુકાવટનો ગુનો નોંધી પોલીસે રિમાન્ડ મેળવવાની તજવીજ હાથ ધરી છે. હેડ કોન્સ્ટેબલને ઉડાવીને ભાગતા બૂટલેગરને પોલીસે પીછો કરી તેની કાર બંધ પડી જતા પકડ્યો ત્યારે પણ પોલીસ સાથે વિરોધ કરી ભાગવા પ્રયત્ન કર્યો હતો. જ્યારે તેને પકડીને પોલીસ સ્ટેશનમાં લઈ ગયા ત્યારે તેણે PSOને પણ ઝાપટ મારી દીધી હતી. હેડ કોન્સ્ટેબલને ઉડાવાની ઘટના સીસીટીવીમાં કેદ થઈ છે. કારથી જોરદાર ટક્કર મારી ઉડાવી દીધા
સુરતના અઠવા લાઈન્સ પોલીસ સ્ટેશનમાં ફરજ બજાવતા હેડ કોન્સ્ટેબલ કારાભાઈ જાદવભાઈ મધરાતે પેટ્રોલિંગ કરી એક વાગ્યાથી ત્રણ વાગ્યા દરમિયાન ટીમલિયાવાડ ત્રણ રસ્તા પાસે પીસીઆર 33 અને 34ના સ્ટાફ સાથે વાહન ચેકિંગ કરતા હતા. ત્યારે અઠવાગેટ તરફથી કાર (GJ-15-CD- 1012) આવતા કારાભાઈએ તેને રોકવા ઈશારો કર્યો હતો. કારચાલકે કાર ઊભી રાખવાના બદલે ફુલ સ્પીડમાં ભગાવી ત્યારબાદ ફરી પરત આવ્યો અને હેડ કોન્સ્ટેબલ કારાભાઇને કારથી જોરદાર ટક્કર મારી ઉડાવી દીધા હતા. હવામાં ફંગોળાઈને જમાદાર બોનેટ પર પટકાયા હતા. જમાદાર બોનેટ પરથી જમીન પર પડ્યા હતા અને કારચાલકે ભાગી છૂટવાનો પ્રયાસ કર્યો હતો. આરોપીએ પોલીસ સકંજામાંથી ભાગવાની કોશિશ કરી
અન્ય પોલીસકર્મીઓ પીસીઆરમાં પીછો કરતા કારચાલક ગાંધીસ્મૃતિ ભવન પાસેથી યુ-ટર્ન લઇ અઠવાગેટ તરફ ભાગવાની ફિરાકમાં હતો. જોકે, કૈલાસ રેસ્ટોરન્ટ પાસે કાર અચાનક બંધ થઇ જતા પોલીસે કારચાલકને પકડી પાડ્યો હતો. અઠવા પોલીસે કારચાલક ચિત્રાર્થ ઉર્ફે ચિતરાજ ઉર્ફે ચિન્ટુ ભરત રાંદેરી (રહે. એકતા સકલ પાસે, નાનપુરા)ને સકંજામાં લઈ સરકારી વાહનમાં બેસાડવા પ્રયાસ કરતા તેણે અહીં પણ આનાકાની કરી, વિરોધ કરી ભાગવાની કોશિશ કરી હતી. પોલીસકર્મીઓ સાથે પણ ગેરવર્તન કર્યું
બળપ્રયોગ કરી પીસીઆરમાં બેસાડી તેને પોલીસ મથકે લઇ જવાયો હતો. જ્યાં અઠવા પોલીસ મથકના PSO સકારામભાઇ સાથે પણ જીભાજોડી કરી ઝાપટ મારી દીધી હતી. પોલીસે આરોપીની વોક્સવેગન કંપનીની વેન્ટો કાર કબજે લીધી હતી અને પોલીસકર્મીની હત્યાની કોશિશ અને સરકારી ફરજમાં રુકાવટનો ગુનો નોંધી ધરપકડ કરી હતી. આરોપીએ ઇરાદાપૂર્વક કરતૂત કર્યું હોવાનું અનુમાન
પોલીસના જણાવ્યા પ્રમાણે ચિત્રાર્થ ઉર્ફે ચિન્ટુ રાંદેરી લિસ્ટેડ બૂટલેગર છે. અઠવા, અડાજણ સહિત 3 પોલીસ મથકે નોંધાયેલા પ્રોહિબિશનના ગુનામાં તે વોન્ટેડ હતો. અઠવામાં પણ તે ઘણી વખત દારૂની હેરાફેરીમાં પકડાઈ ચૂક્યો છે. અગાઉ તેના બે કેસની તપાસ હેડ કોન્સ્ટેબલ કારાભાઈ જ કરી ચૂક્યા છે. જેથી કિન્નાખોરી કહો કે દાઝ રાખી બૂટલેગર રાંદેરીએ હેડ કોન્સ્ટેબલ કારાભાઈને ઇરાદાપૂર્વક કારથી ઉડાવી દેવાની કરતૂત કરી હતી. કારમાં બે વખત રેકી કરતો પણ સીસીટીવીમાં કેદ થયો હતો.