કાકાના હુલામણા નામથી જાણીતા કડીના ધારાસભ્યનું નિધન:કેન્સરની લાંબી બીમારી બાદ કરશન સોલંકીએ અમદાવાદ સિવિલમાં અંતિમશ્વાસ લીધા; 11 કલાકે અંતિમયાત્રા નીકળશે

કડી વિધાનસભા ક્ષેત્રના ભાજપના વરિષ્ઠ ધારાસભ્ય કરશનભાઈ સોલંકીનું લાંબી માંદગી બાદ અવસાન થયું છે. નગરાસણ ગામના વતની કરશનભાઈ છેલ્લા બે ટર્મથી કડી વિધાનસભાનું પ્રતિનિધિત્વ કરી રહ્યા હતા. રાજકીય વર્તુળોમાં ‘108’ તરીકે જાણીતા કરશનભાઈ છેલ્લા દોઢ વર્ષથી કેન્સરની બીમારીથી પીડાઈ રહ્યા હતા. ગઈકાલે તેમની તબિયત વધુ લથડતા તેમને તાત્કાલિક અમદાવાદ સિવિલ હોસ્પિટલમાં દાખલ કરવામાં આવ્યા હતા. જોકે, સારવાર દરમિયાન તેમણે અંતિમશ્વાસ લીધા હતા. તેમના અવસાનના સમાચાર મળતાં જ સમગ્ર કડી પંથકમાં શોકની લાગણી છવાઈ ગઈ છે. ખાસ કરીને ભાજપના કાર્યકર્તાઓમાં ઘેરા શોકની લાગણી જોવા મળી રહી છે. આજે સવારે સાડા 10:30 વાગ્યા સુધી પાર્થિવદેહના અંતિમદર્શન કરી શકાશે. જે બાદ તેમના નિવાસસ્થાન (જય ભોલે રેસીડેન્સી, જૂની આદર્શ હોસ્ટેલ પાસે કડી)થી સવારે 11 વાગ્યે અંતિમ યાત્રા નીકળશે. તેમના વતન નગરાસણ ગામે અંતિમ સંસ્કાર કરવામાં આવશે. કરશનભાઈ સોલંકીના નિધનથી કડીમાં શોકનો માહોલ છવાયો છે. કરશનભાઈએ તેમના રાજકીય કાર્યકાળ દરમિયાન કડી વિસ્તારના વિકાસ માટે નોંધપાત્ર યોગદાન આપ્યું હતું. તેઓ સતત બે ટર્મથી વિધાનસભામાં ચૂંટાઈને આવતા હતા, જે તેમની લોકપ્રિયતા અને કાર્યક્ષમતાનો પુરાવો છે. તેમના અવસાનથી ગુજરાત રાજકારણમાં એક અનુભવી નેતાની ખોટ સર્જાઈ છે. સી.આર.પાટીલે તેમના અવસાનનું દુ:ખ વ્યક્ત કરતાં સોશિયલ મીડિયા પર જણાવ્યું હતું કે, કડીના ધારાસભ્ય કરશનભાઈ સોલંકીનાં દુ:ખદ નિધનથી વ્યથિત છું, ઇશ્વર એમના દિવંગત આત્માને શાંતિ પ્રદાન કરે અને પરિવારજનોને આ આઘાત સહન કરવાની શક્તિ આપે એવી પ્રાર્થના. એમણે કરેલા સેવાના કાર્યોની સુગંધ સદાય ચોમેર પ્રસરતી રહેશે. ઓમ શાંતિ ! કરશન સોલંકી પોતાના સરળ અને સૌમ્ય સ્વભાવને કારણે લોકપ્રિય નેતા હતા. ધારાસભ્ય હોવા છતાં વિધાનસભા જવા સરકારી બસનો જ ઉપયોગ કરતા હતા. તેમના મત વિસ્તારમાં નાનામાં નાના વ્યક્તિને ખૂબ સરળ સ્વભાવથી મળતા. લોકો તેમને કાકાના હુલામણા નામથી બોલાવતા હતા. ત્યારે તેમની આકસ્મિક વિદાયથી કડીમાં શોકનો માહોલ છવાયો છે.​​​​​​​ ​​​​​​​કરશન સોલંકી હંમેશા સાદગીભર્યું જીવન જીવ્યાં
કરશનભાઇ સોલંકી વ્યવસાયે ખેડૂત હતા અને ગાંધીવાદી વિચારધારા ધરાવતા હતા. તેઓ 15 વર્ષ કરતાં વધુ સમય સક્રિયરૂપે રાજકારણમાં રહ્યા. માત્ર 12મા ધોરણ સુધી ભણેલા 67 વર્ષના વૃદ્ધ દરેક જગ્યાએ ચાલતા જતા હતા. તેઓ આખી જિંદગી કડી તાલુકાના નગરાસણ ગામમાં રહ્યા અને 60 વર્ષની વયે કડીના ધારાસભ્ય બન્યા. રસપ્રદ વાત એ છે કે, આ એ સીટ હતી જ્યાંથી લોકપ્રિય ગુજરાતી ફિલ્મ સ્ટાર હિતુ કનોડિયા હારી ગયા હતા. બસમાં કે ચાલીને જ અવરજવર કરતા
જાણીને આશ્વર્ય થશે કે કડી વિધાનસભા બેઠક પર ભાજપમાંથી ઉમેદવારી કરી અને વિજેતા બનેલા કરશન સોલંકી પાસે જનપ્રતિનિધિ તરીકે ઘણી બધી સુવિધાઓ ઉપલબ્ધ હોવા છતાં, તેઓ સામાન્ય માણસ બનીને જ રહેતા અને અન્ય સામાન્ય માણસની જેમ સુવિધાઓનો ઉપયોગ કરતા હતા. વાસ્તવમાં, કડીના રહેવાસીઓ માટે કરસન સોલંકીને બસમાં અથવા મોટાભાગે કોઈ જગ્યાએ ચાલતા જતા જોવાનું દૃશ્ય સામાન્ય હતું.