શિવસેના (UBT)ના નેતા સંજય રાઉતે મંગળવારે દાવો કર્યો હતો કે મહારાષ્ટ્રના મુખ્યમંત્રી દેવેન્દ્ર ફડણવીસ હજુ સુધી મુખ્યમંત્રી હાઉસ ‘વર્ષા’ બંગલામાં શિફ્ટ થયા નથી કારણ કે નાયબ મુખ્યમંત્રી એકનાથ શિંદેએ ત્યાં કાળો જાદુ કર્યો હતો. રાઉતે આરોપ લગાવ્યો હતો કે ગુવાહાટીના કામાખ્યા મંદિરમાં એક ભેંસનો બલિ ચડાવવામાં આવ્યો હતો અને તેના શિંગડા બંગલાના લોનમાં દાટી દેવામાં આવ્યા હતા જેથી બીજું કોઈ મુખ્યમંત્રી ન બની શકે. આ જ કારણ છે કે ઘણા મહિનાઓથી મુખ્યમંત્રી હોવા છતાં ફડણવીસ ત્યાં જવાનું ટાળી રહ્યા છે. રાઉતના દાવાઓ પર, ફડણવીસે કહ્યું, હું વર્ષા બંગલામાં ત્યારે જ શિફ્ટ થઈશ જ્યારે એકનાથ શિંદે તેને ખાલી કરશે. હાલમાં ત્યાં નાના સમારકામનું કામ પણ ચાલી રહ્યું છે. વધુમાં, મારી દીકરીએ તેની 10મા ધોરણની બોર્ડ પરીક્ષા પછી શિફ્ટ થવાની ઇચ્છા વ્યક્ત કરી છે. એટલા માટે હું હજુ સુધી ત્યાં ગયો નથી. ફડણવીસે કહ્યું, મારા સ્તરનો વ્યક્તિ આવા પાયાવિહોણા દાવાઓનો જવાબ આપવાનું પણ જરૂરી માનતો નથી. રાઉતે કહ્યું- વર્ષા બંગલામાં એવું શું થયું કે ફડણવીસ ત્યાં જવાથી ડરી રહ્યા છે રાઉતે કહ્યું, ‘અમે અંધશ્રદ્ધામાં માનતા નથી, પરંતુ બંગલાના કર્મચારીઓમાં ચર્ચા છે કે આ શિંગડાઓ પર કોઈ તંત્ર-મંત્ર કરવામાં આવ્યું છે.’ એવું કહેવામાં આવી રહ્યું છે કે તેમને એ હેતુથી દફનાવવામાં આવ્યા હતા કે કોઈ પણ નવો મુખ્યમંત્રી લાંબા સમય સુધી સત્તામાં ન રહી શકે. રાઉતે પ્રશ્ન ઉઠાવ્યો કે, વર્ષા બંગલામાં એવું શું થયું કે ફડણવીસ ત્યાં જવાથી ડરી રહ્યા છે? સરકાર દ્વારા તેમને આપવામાં આવેલા સત્તાવાર નિવાસસ્થાનમાં જવા માટે વિલંબ કેમ થઈ રહ્યો છે? ફડણવીસ પરિવારે ત્યાં રહેવું જોઈએ. જો તેઓ ત્યાં સૂવા તૈયાર ન હોય, તો ચોક્કસપણે કોઈ સમસ્યા છે. તેમને શેનો ડર છે? છેવટે, ત્યાં શું થયું? આ દાવાઓ અંગે નાયબ મુખ્યમંત્રી એકનાથ શિંદેએ કહ્યું કે જે લોકો આવા દાવા કરી રહ્યા છે તેમને જ આનો અનુભવ થશે.
