અમદાવાદ મનપા કમિશનરે આજે વર્ષ 2025-26નું રૂ. 14,001 કરોડનું ડ્રાફ્ટ બજેટ સ્ટેન્ડિંગ કમિટી સમક્ષ રજૂ કર્યું છે. બજેટમાં મિલકત વેરા સિવાય એકપણ વેરામાં વધારો સૂચવાયો નથી. સસ્ટેનેબલ અને ક્લાઈમેટ ચેન્જ થીમ પર રજૂ કરેલા બજેટમાં અમદાવાદ શહેરની ટ્રાફિક સમસ્યા ઘટાડવા પર ફોકસ કરાયું છે, સાથે 2036 ઓલિમ્પિકની દાવેદારીને ધ્યાનમાં રાખી અલગ અલગ વિસ્તારોમાં 15 સ્પોર્ટ્સ ગ્રાઉન્ડ, સ્પોર્ટસ કોમ્પ્લેક્સ બનાવાશે. મહિલાઓ માટે પણ દરેક ઝોનમાં જિમ અને સ્વિમિંગ પૂલ બનાવવાનું આયોજન છે. મિલકત વેરા સિવાય એકપણ ટેક્સમાં વધારો ન સૂચવાયો
રાજ્યની સૌથી મોટી મહાનગરપાલિકા એટલે અમદાવાદ મ્યુનિસિપલ કોર્પોરેશન (AMC)નું મ્યુ. કમિશનર એમ. થેન્નારેસન દ્વારા વર્ષ 2025-26નું રૂપિયા 14,001 કરોડનું બજેટ રજૂ કરવામાં આવ્યું હતું. સસ્ટેનેબલ અને ક્લાઈમેટ ચેન્જ થીમ પર રજૂ કરેલા બજેટમાં ટેક્સના દરમાં કોઇ વધારો કરવામાં આવ્યો નથી. વોટર ટેક્સ તથા કન્વર્ઝન્સી ટેક્સના દરમાં કોઇ વધારો કરાયો નથી. વર્ષ 2023-24ના બજેટમાં દર વર્ષે બે ટકા ટેક્સના વધારાની જોગવાઈ કરવામાં આવી હતી. એ મુજબ વર્ષ 2025-26 માટે રહેણાંક મિલકતનો પ્રતિ ચોરસ મીટર રૂપિયા 20.80 અને બિનરહેઠાણ મિલકતો માટે રૂપિયા 35.36 ટેક્સનો દર રહેશે. મ્યુનિસિપલ કમિશનર દ્વારા રજૂ કરવામાં આવેલા બજેટમાં નાગરિકોની પ્રાથમિક સુવિધાનાં કામો પર વધુ ભાર મુકાયો છે. નારોલથી નરોડાના રોડને આઇકોનિક રોડ બનાવાશે
શહેરમાં 36 જેટલા મહત્ત્વના રોડ (પ્રિસેન્ટ સ્ટ્રીટ) અલગ અલગ થીમ પર 331 કરોડના ખર્ચે વિકસાવવામાં આવશે. 72.55 કિમીના રોડમાં મેટ્રો સ્ટેશનને જોડતા, બિઝનેસ, કલ્ચર, હેરિટેજ, સ્પોર્ટ્સ, એજ્યુકેશન અને હેલ્થ થીમ પર રોડ વિકસાવવામાં આવશે. 185 કરોડના ખર્ચે 20 કિમી ઇન્ટ્રિગ્રેટેડ કોમર્શિયલ સ્ટ્રીટ પણ વિકસાવવામાં આવશે. 140 કરોડના ખર્ચે નારોલથી નરોડાના 14 કિમીના રોડને આઇકોનિક રોડ બનાવવામાં આવશે. નવા રોડ-રસ્તા અને રિસર્ફેસના 1,200 કરોડ ફાળવ્યા
અમદાવાદ મ્યુ. કમિશનર એમ. થેન્નારેસન દ્વારા વર્ષ 2025-26 માટેનું 6 ફેબ્રુઆરીના રોજ ગુરુવારે સ્ટેન્ડિંગ કમિટીના ચેરમેન દેવાંગ દાણી સમક્ષ 14,001 કરોડનું બજેટ રજૂ કરાયું છે. બજેટમાં 6,200 કરોડની રેવન્યૂ અને 7,801 કરોડનો કેપિટલ ખર્ચ થશે. 2,800 કરોડ વિકાસ કાર્યો પાછળ ખર્ચવામાં આવશે. કમિશનર દ્વારા સૂચવવામાં આવેલા બજેટમાં 9,000 કરોડ રૂપિયાની રેવન્યુ આવક દર્શાવવામાં આવી છે, જેમાં ટેક્સની આવક 1,759 કરોડ થવાનો અંદાજ છે. નાગરિકોની પ્રાથમિક સુવિધાઓમાં વધારો કરવામાં આવ્યો છે. ઝોનલદીઠ કામ માટે કુલ 1,000 કરોડની ફાળવણી કરવામાં આવી છે. શહેરમાં 550 કિમીના નવા રોડ-રસ્તા તેમજ રિસર્ફેસ પાછળ 1,200 કરોડ ફાળવવામાં આવ્યા છે. દરેક વોર્ડ લેવલે SHE LOUNGE બનાવાશે
વર્ષ 2025-26ના બજેટમાં મહિલાઓ માટે દરેક વોર્ડ લેવલે SHE LOUNGE બનાવવામાં આવશે. દરેક ઝોનમાં મહિલાઓ માટે જિમ અને સ્વિમિંગ પૂલ બનાવવામાં આવશે. દરેક ઝોનમાં ત્રણ નવા પિંક ટોઇલેટ બનાવવામાં આવશે. મહિલાઓના કેન્સરના રોગનું પહેલાંથી નિદાન થાય એ માટે દરેક મહિલા કોર્પોરેટરો અને AMCમાં કામ કરતાં મહિલા કર્મચારીઓ જેમની ઉંમર 40 વર્ષથી વધારે હોય તેમને મેમોગ્રાફી ટેસ્ટ SVP હોસ્પિટલમાં સસ્તા દરે કરી આપવામાં આવશે. દરેક ઝોનમાં સ્પોર્ટ્સના ઇન્ફ્રાસ્ટ્રક્ચર બનાવાશે
ઓલિમ્પિક 2036ને ધ્યાનમાં લઈ અમદાવાદ શહેરમાં સ્પોર્ટ્સ પ્રવૃત્તિને વેગ આપવા માટે મ્યુનિસિપલ કોર્પોરેશન દ્વારા આગામી વર્ષ 2025-26ના બજેટમાં દરેક ઝોનમાં વિવિધ જગ્યાએ સ્પોર્ટ્સના ઈન્ફાસ્ટ્રકચર બનાવવામાં આવશે, જેમાં 15 પ્લે ગ્રાઉન્ડ, 8 સ્પોર્ટ્સ કોમ્પ્લેક્સ અને ઓપન એથ્લેટિક ટ્રેક સાથે ઓપન સ્પોર્ટ્સ કોમ્પ્લેક્સ બનશે. 15 જગ્યાએ પ્લેગ્રાઉન્ડ બનાવવામાં આવશે
ઓલિમ્પિકને લઈને બનાવવામાં આવનારા પ્લેગ્રાઉન્ડમાં મેદાનની ફરતે કમ્પાઉન્ડ વોલ સાથે વોકિંગ ટ્રેક તેમજ વચ્ચેના ભાગમાં કબડ્ડી, ખો-ખો, વોલીબોલ, બાસ્કેટબોલ તેમજ એથ્લેટિક વગેરે જેવી વિવિધ રમતો રમી શકાય એની વ્યવસ્થા તેમજ ચેન્જિંગ રૂમ, ટોઇલેટ બ્લોક, પીવાના પાણીની વ્યવસ્થા વગેરે યુટિલિટીનો સમાવેશ કરવામાં આવ્યો છે. 15 જગ્યાએ પ્લેગ્રાઉન્ડ બનાવવામાં આવશે. 8 જગ્યાએ સ્પોર્ટસ કોમ્પ્લેક્સ બનાવશે
જ્યારે સ્પોર્ટ્સ કોમ્પ્લેક્સમાં એથ્લેટિક ટ્રેક, મલ્ટીપર્પસ કોર્ટ, સ્વિમિંગ પૂલ, જિમ્નેશિયમ, વોલીબોલ, બાસ્કેટબોલ, ઈન્ડોર ગેમ્સ વગેરે જેવી વિવિધ રમતો રમી શકાય એની વ્યવસ્થાની સાથે રિસેપ્શન, એડમિન ઓફિસ, ઈન્સ્ટ્રક્ટર રૂમ, મેડિકલ રૂમ, કાફેટેરિયા તેમજ ચેન્જિંગ રૂમ, શાવર રૂમ, ટોઈલેટ બ્લોક, પીવાના પાણીની વ્યવસ્થા વગેરે યુટિલિટીનો સમાવેશ કરવામાં આવ્યો છે, જે પૈકી હાલમાં એક જગ્યાએ સ્પોર્ટસ કોમ્પ્લેક્સ બનાવવાની કામગીરી ચાલુ છે. કુલ 8 જગ્યાએ સ્પોર્ટસ કોમ્પ્લેક્સ બનાવશે. ઓપન એથ્લેટિક ટ્રેક સાથે ઓપન સ્પોર્ટ્સ કોમ્પ્લેક્સ બનાવાશે
જ્યારે ઓપન સ્પોર્ટ્સ કોમ્પ્લેક્સ ઓપન એથ્લેટિક ટ્રેક સાથે બનાવવામાં આવશે, જેમાં ઓપન સ્પોર્ટ્સને લગતી વિવિધ રમતો, જેવી કે દોડ, લાંબી કૂદ, ઊંચી કૂદ, ગોળાફેંક, બરછીફેંક, ચક્રફેંક, એથ્લેટિક ટ્રેક, ફૂટબોલ, વોલીબોલ, બાસ્કેટબોલ, ટેનિસ કોર્ટ, કબડ્ડી વગેરે જેવી ખુલ્લા મેદાનમાં રમાઇ શકે એવી રમતોનો સમાવેશ કરવામાં આવ્યો છે. એમાં રમતવીરો પ્રેક્ટિસ કરી શકશે તેમજ વિવિધ શાળાઓ અને કોલેજના રમતગમતના પ્રોગ્રામ પણ થઇ શકશે. ખાસ સિટી ટૂરિઝમ સેલ ઊભું કરવામાં આવશે
સ્માર્ટ અને હેરિટેજ સિટી અમદાવાદ લોકોને આકર્ષી રહી છે. કોલ્ડપ્લે જેવા કાર્યક્રમો અમદાવાદમાં યોજાયા છે, ત્યારે આગામી દિવસોમાં વધુ ને વધુ લોકો અમદાવાદની મુલાકાત લઈ સિટી ટૂરિઝમને પ્રોત્સાહન મળે એ માટે પ્રયાસો કરવામાં આવશે. ખાસ સિટી ટૂરિઝમ સેલ ઊભું કરવામાં આવશે. અમદાવાદમાં આવેલાં વિવિધ ટૂરિસ્ટ સ્થળોનો વધુ ને વધુ પ્રચાર કરવામાં આવશે.
AMCનું 14,001 કરોડનું બજેટ:ઓલિમ્પિકને લઈ સ્પોર્ટ્સ ગ્રાઉન્ડ બનશે, 36 રોડ થીમ આધારિત ડેવલપ કરશે; 10 સ્થળે અંડરપાસ અને ઓવરબ્રિજ
