16 જાન્યુઆરીના રોજ સૈફ અલી ખાન પર તેના ઘરે હુમલો થયો હતો. તેમના પર છ વાર છરી વડે હુમલો કરવામાં આવ્યો હતો, જેના કારણે તેને ઘાયલ હાલતમાં લીલાવતી હોસ્પિટલમાં દાખલ કરવામાં આવ્યો હતો. હવે સૈફ સ્વસ્થ છે અને તેની આગામી ફિલ્મ ‘ધ જ્વેલ થીફ’ના પ્રમોશનમાં વ્યસ્ત છે. આ દરમિયાન, તેમની બહેન સબા અલી ખાને સૈફ અને તેમના બાળકો સહિત પરિવારની સુરક્ષા માટે કુરાન ખ્વાનીની વ્યવસ્થા કરી હતી. સબા અલી ખાન પટૌડીએ તાજેતરમાં જ પોતાના સોશિયલ મીડિયા એકાઉન્ટ પરથી કુરાન ખ્વાનીનો ફોટો શેર કર્યો છે. તેમણે મદરેસાના બાળકોને કુરાન પઠન માટે બોલાવ્યા હતા. આ સાથે, તેમણે તેમના બાળકો અને પરિવાર માટે સદકા(દાન) પણ કર્યું છે. તસવીરની સાથે સબાએ લખ્યું,- “વિશ્વાસ મારા માટે સૌથી વધુ મહત્ત્વ ધરાવે છે.” તેથી મેં ભાઈ અને તેના પરિવાર, બાળકો ટિમ (તૈમુર)-જેહ (જહાંગીર) અને ભાભી (કરીના) માટે કુરાન ખ્વાની અને સદકાનું આયોજન કર્યું છે. હંમેશા સલામતી.’ નોંધનીય છે કે, સૈફ અલી ખાન ટૂંક સમયમાં નેટફ્લિક્સની ફિલ્મ ‘ધ જ્વેલ થીફ’માં જોવા મળશે. તાજેતરમાં નેટફ્લિક્સે આ ફિલ્મની સત્તાવાર જાહેરાત કરી છે. હુમલા પછી, સૈફ અલી ખાન પહેલીવાર જાહેરમાં નેટફ્લિક્સના કાર્યક્રમનો ભાગ બન્યો. આ દરમિયાન, તેના એક હાથ પર અને ગરદન પર પાટો જોવા મળ્યો. બીજી તરફ, સૈફ અલી ખાનના પુત્ર ઇબ્રાહિમ અલી ખાનની ડેબ્યૂ ફિલ્મ ‘નાદાનિયાં’ની પણ નેક્સ્ટ ઓન નેટફ્લિક્સ ઇવેન્ટમાં જાહેરાત કરવામાં આવી હતી. તેણે કો-એક્ટ્રેસ ખુશી કપૂર સાથે આ કાર્યક્રમમાં હાજરી આપી હતી અને ફિલ્મના ગીત “ઇશ્ક મેં” પર પર્ફોર્મ કર્યું હતું. સૈફ પર થયેલા હુમલાની વાત કરીએ તો, તેના પર હુમલો કરનાર વ્યક્તિની ઓળખ શરીફુલ ઇસ્લામ તરીકે થઈ છે. હુમલાના ત્રીજા દિવસે મુંબઈ પોલીસે શરીફુલની મુંબઈથી ધરપકડ કરી. પોલીસના જણાવ્યા અનુસાર, શરીફુલ એક બાંગ્લાદેશી છે જે ગેરકાયદેસર રીતે ભારત આવ્યો હતો. સૈફના મકાનમાંથી મળેલા સીસીટીવી ફૂટેજમાં દેખાતા વ્યક્તિ પાસેથી શરીફુલનો ચહેરો ઓળખવાનો ટેસ્ટ પણ પોઝિટિવ આવ્યો છે. સૈફના ઘરેથી મળેલા ફિંગરપ્રિન્ટ્સ પણ શરીફુલના ફિંગરપ્રિન્ટ્સ સાથે મેચ થયા છે. 29 જાન્યુઆરીએ શરીફુલને 14 દિવસ માટે ન્યાયિક કસ્ટડીમાં લેવામાં આવ્યો હતો. હાલમાં, આ કેસની વિગતવાર તપાસ ચાલી રહી છે.
