LSGના માલિકે માન્ચેસ્ટર ઓરિજિનલ્સમાં 70% હિસ્સો ખરીદ્યો:IPL ફ્રેન્ચાઇઝીની જાહેરાત; ગોએન્કાએ કહ્યું- અમે શ્રેષ્ઠતામાં માનીએ છીએ

IPL ફ્રેન્ચાઇઝ લખનઉ સુપર જાયન્ટ્સની માલિકી ધરાવતા RPSG ગ્રૂપે ઇંગ્લેન્ડના લેન્કેશાયર ક્રિકેટ ક્લબ પાસેથી ધ હન્ડ્રેડ ટીમ માન્ચેસ્ટર ઓરિજિનલ્સમાં 70% હિસ્સો ખરીદ્યો છે. લેન્કેશાયર માન્ચેસ્ટર ઓરિજિનલ્સની માલિકીની કંપની છે. RPSG ગ્રૂપે શુક્રવારે સત્તાવાર રીતે આ સોદાની જાહેરાત કરી. આ મુજબ, ઇંગ્લેન્ડના લેન્કેશાયર ક્રિકેટ ક્લબનો ટીમમાં 30% હિસ્સો રહેશે. ગ્રૂપ ચેરમેન સંજીવ ગોયેન્કાએ કહ્યું: ‘અમે લેન્કેશાયરના વારસાનું સન્માન કરીએ છીએ. અમે અમારા ખેલાડીઓ, સપોર્ટ ટીમ અને સમુદાય સાથે ખાસ સંબંધ બાંધવા માટે પ્રતિબદ્ધ છીએ. અમે શ્રેષ્ઠતામાં માનીએ છીએ. અમને આવનારી પેઢીઓ માટે ક્વોલિટી ક્રિકેટની અપાર સંભાવના દેખાય છે.’ 11 દિવસ પહેલા 1252 કરોડની બોલી લાગી હતી
RPSG ગ્રૂપે 11 દિવસ પહેલા 4 ફેબ્રુઆરીએ ઇંગ્લિશ લીગ ધ હંડ્રેડની ફ્રેન્ચાઈઝી માટે બોલી લગાવી હતી. ત્યારબાદ મીડિયા રિપોર્ટ્સમાં દાવો કરવામાં આવ્યો હતો કે ભારતીય ગ્રૂપે ઇંગ્લિશ ફ્રેન્ચાઇઝીમાં 49 ટકા હિસ્સો ખરીદવા માટે લગભગ 1,252 કરોડ રૂપિયાની સૌથી વધુ બોલી લગાવી હતી. આ જૂથે 1 ફેબ્રુઆરીના રોજ ‘લંડન સ્પિરિટ’ માટે અસફળ બોલી લગાવી હતી. આ ઓક્શન સિલિકોન વેલીના એક ટેક કન્સોર્ટિયમે જીતી હતી. લેન્કેશાયરે 4 ફેબ્રુઆરીના રોજ એક નિવેદનમાં જણાવ્યું હતું કે- અમે શ્રેષ્ઠ જીવનસાથી શોધી રહ્યા હતા. RPSG ગ્રૂપ છેલ્લા કેટલાક સમયથી અમારા પસંદગીના બિડર રહ્યા છે. અમે આ પરિણામથી ખૂબ જ ખુશ છીએ. અમે સાથે મળીને એક મહાન ભવિષ્ય બનાવવા માટે ઉત્સાહિત છીએ. અમારું સંયુક્ત લક્ષ્ય માન્ચેસ્ટર અને ઉત્તર પશ્ચિમ ક્ષેત્રના લોકો માટે એક ખાસ ક્રિકેટ ટીમ બનાવવાનું છે. રિષભ પંતને નવો કેપ્ટન બનાવ્યો
RPSGના ચેરમેન સંજીવ ગોયેન્કાએ ગયા મહિને 20 જાન્યુઆરીએ રિષભ પંતને IPL ફ્રેન્ચાઇઝ લખનઉ સુપર જાયન્ટ્સના કેપ્ટન તરીકે નિયુક્ત કર્યા હતા. નવેમ્બર 2024ના મેગા ઓક્શનમાં ફ્રેન્ચાઇઝીએ પંતને INR 27 કરોડ (આશરે US$3.21 મિલિયન)માં ખરીદ્યો હતો. આ સાથે, પંત IPLનો સૌથી મોંઘો ખેલાડી બની ગયો. ગોએન્કાએ 2 વર્ષ પહેલાં SA20માં લીગ ખરીદી હતી
RPSG ગ્રૂપના ચેરમેન અને સ્થાપક ગોયન્કાએ 2022માં SA20માં ડર્બન ફ્રેન્ચાઇઝ ખરીદતા પહેલા 2021માં IPLમાં લખનઉ ફ્રેન્ચાઇઝી 7,090 કરોડ રૂપિયામાં ખરીદી હતી. આ પહેલા તેઓ રાઇઝિંગ પુણે સુપરજાયન્ટના માલિક પણ હતા. RPSG ગ્રૂપે 2016 અને 2017ની IPL સીઝનમાં ભાગ લીધો હતો જ્યારે ચેન્નઈ સુપર કિંગ્સ અને રાજસ્થાન રોયલ્સ સસ્પેન્ડ કરવામાં આવ્યા હતા.