PM મોદી સાથે મુલાકાત બાદ મસ્કનો ફરી ભારતને ઝટકો:ભારતીય ચૂંટણીમાં યુએસ ફંડિગ બંધ કર્યું, અમેરિકાએ ભારતને 1.82 અબજ ડોલરની સહાય બંધ કરી

અમેરિકાની ડોનાલ્ડ ટ્રમ્પ સરકાર બજેટ કાપ પર કડકાઈથી કામ કરી રહી છે. આ સંદર્ભમાં અમેરિકાએ ભારતને આપવામાં આવનાર કરોડો ડોલરની રકમ પર રોક લગાવી દીધી છે. ઈલોન મસ્કના ડિપાર્ટમેન્ટ ઓફ ગવર્નમેન્ટ એફિશિયન્સી (DOGE)એ રવિવારે જાહેરાત કરી કે અમેરિકાએ ભારતમાં મતદાન વધારવા માટે રચાયેલ 21 મિલિયન ડોલરના કાર્યક્રમમાં ઘટાડો કરવાનો નિર્ણય લીધો છે. ભારતને આપવામાં આવતી સહાયમાં મોટો કાપ
નોંધનીય છે કે અમેરિકા દેશની ચૂંટણીઓમાં મતદારોની ભાગીદારીને પ્રોત્સાહન આપવા માટે ભારતને 1 અબજ 82 કરોડ રૂપિયા (21 મિલિયન ડોલર) આપતું હતું. પરંતુ હવે ભારતને આ ભંડોળ મળશે નહીં. ઉલ્લેખનીય છે કે ડોનાલ્ડ ટ્રમ્પની ભારતીય વડાપ્રધાન નરેન્દ્ર મોદી સાથેની મુલાકાતના થોડા દિવસો પછી જ આ જાહેરાત કરવામાં આવી છે. આ મુલાકાત દરમિયાન બંને નેતાઓએ અમેરિકા-ભારત સંબંધોને મજબૂત બનાવવા માટે મહત્વપૂર્ણ જાહેરાતો કરી હતી. આ નિર્ણય બાદ ભારતમાં શાસક પક્ષ ભાજપે પણ પ્રતિક્રિયા આપી છે. ભાજપ આઈટી સેલના વડા અમિત માલવિયાએ દાવો કર્યો છે કે આ ભંડોળનો ઉપયોગ ભારતીય ચૂંટણીઓને પ્રભાવિત કરવા માટે કરવામાં આવ્યો હતો. માલવિયાએ કોંગ્રેસ પાર્ટી અને અમેરિકન ઉદ્યોગપતિ જ્યોર્જ સોરોસ પર ચૂંટણીમાં દખલ કરવાનો આરોપ લગાવ્યો છે. DOGE એ લખ્યું છે કે અમેરિકન કરદાતાઓના પૈસા પર થયેલા આ બધા ખર્ચ રદ કરવામાં આવ્યા છે. ભાજપે ચૂંટણીમાં ભંડોળ પર સવાલ ઉઠાવ્યા DOGEના નિર્ણય પર ભાજપના નેતા અમિત માલવિયાએ પ્રતિક્રિયા આપી છે. આમાં તેમણે ભારતીય ચૂંટણીઓમાં 182 કરોડ રૂપિયાના ભંડોળ અંગે પ્રશ્નો ઉઠાવ્યા હતા. માલવિયાએ તેને ભારતની ચૂંટણીમાં બાહ્ય હસ્તક્ષેપ ગણાવ્યો. માલવિયાએ પ્રશ્ન ઉઠાવ્યો કે આ ભંડોળનો લાભ કોને મળશે. ભાજપના નેતાએ કહ્યું કે આનાથી શાસક પક્ષ (ભાજપ)ને ચોક્કસપણે ફાયદો થશે નહીં. બીજી એક પોસ્ટમાં, અમિત માલવિયાએ કોંગ્રેસ પાર્ટી અને જ્યોર્જ સોરોસ પર ભારતીય ચૂંટણીમાં દખલ કરવાનો આરોપ લગાવ્યો. માલવિયાએ સોરોસને ગાંધી પરિવારના જાણીતા સહયોગી ગણાવ્યા. માલવિયાએ X પર લખ્યું હતું કે એસવાય કુરેશીના નેતૃત્વમાં ચૂંટણી પંચે 2012માં ઇન્ટરનેશનલ ફાઉન્ડેશન ફોર ઇલેક્ટોરલ સિસ્ટમ્સ (IFES) સાથે એક MOU પર હસ્તાક્ષર કર્યા હતા. આ IFES જ્યોર્જ સોરોસના ઓપન સોસાયટી ફાઉન્ડેશન સાથે જોડાયેલ છે. તેને મુખ્યત્વે USAID તરફથી નાણાકીય સહાય મળે છે. મસ્ક 3 દિવસ પહેલા પીએમ મોદીને મળ્યા હતા અમેરિકાની મુલાકાતે ગયેલા પીએમ મોદીને ગુરુવાર, 13 ફેબ્રુઆરીના રોજ DOGEના વડા ઈલોન મસ્ક મળ્યા હતા. મસ્ક પીએમને મળવા માટે બ્લેર હાઉસ પહોંચ્યા હતા. ભારતીય વિદેશ મંત્રાલયના જણાવ્યા અનુસાર મસ્ક અને મોદીએ ઈનોવેશન, સ્પેસ, આર્ટિફિશિયલ ઇન્ટેલિજન્સ તેમજ ભારતીય અને અમેરિકન સંસ્થાઓ વચ્ચે સહયોગને મજબૂત બનાવવા અંગે ચર્ચા કરી. પીએમ મોદીએ તેમના X એકાઉન્ટ પર ઈલોન મસ્ક સાથેની મુલાકાતના ફોટા શેર કર્યા. તેમણે લખ્યું, ‘ઈલોન મસ્ક સાથે સરસ મુલાકાત થઈ.’ અમે ઘણા મુદ્દાઓ પર ચર્ચા કરી. આમાં એવા મુદ્દાઓનો સમાવેશ થાય છે જેના વિશે મસ્ક ખૂબ જ ઉત્સાહી છે. જેમ કે અવકાશ, મોબિલિટી, ટેકનોલોજી અને ઈનોવેશન. મેં તેમની સાથે ‘મિનિમમ ગવર્મેન્ટ, મેક્સિમમ ગવર્નસ’ ને પ્રોત્સાહન આપવાના ભારતના પ્રયાસો વિશે વાત કરી. DOGE સરકારી ખર્ચ ઘટાડવા પર કામ કરી રહ્યું છે મસ્કનો વિભાગ DOGE પર સરકારી ખર્ચમાં મોટા પાયે ઘટાડો કરવા માટે કામ કરી રહ્યો છે. સીએનએનના અહેવાલ મુજબ, ડોનાલ્ડ ટ્રમ્પ વહીવટીતંત્રના આ વિભાગે સરકારી ખર્ચમાં ઝડપથી ઘટાડો કરવાનું લક્ષ્ય રાખ્યું છે. DOGEના નિર્ણયને કારણે વિશ્વના આ દેશોને મળતી આ રકમ હવે બંધ થઈ જશે.