સ્વર્ગસ્થ એક્ટ્રેસ નૂતનની પૌત્રી અને મોહનીશ બહલની પુત્રી પ્રનૂતન બહલ ટૂંક સમયમાં હોલિવૂડમાં ડેબ્યૂ કરવા માટે તૈયાર છે . તે ‘ કોકો એન્ડ નટ ‘ ફિલ્મમાં એક્ટર રહસાન નૂર સાથે મુખ્ય ભૂમિકા ભજવશે . આ ફિલ્મ એક રોમેન્ટિક વાર્તા પર આધારિત છે અને 2025 માં રિલીઝ થશે. પ્રનૂતન માટે હોલિવુડ ડેબ્યૂ એક મોટી તક છે અને તે તેના માટે ખૂબ જ ઉત્સાહિત છે. દિવ્ય ભાસ્કર સાથેની વાતચીતમાં, તેમણે પોતાની કારકિર્દી અને આ નવા પ્રોજેક્ટ વિશે ખૂલીને ચર્ચા કરી. તમને આ પ્રોજેક્ટ કેવી રીતે મળ્યો અને તેને પસંદ કરવાનું કારણ શું હતું? ‘હું ખૂબ ખુશ છું. આ મારા માટે ખૂબ મોટી વાત છે. આ ફિલ્મમાં મારું પાત્ર ખૂબ જ સુંદર છે અને તે સંપૂર્ણપણે રોમેન્ટિક ફિલ્મ છે. મારી પહેલી ફિલ્મ ‘નોટબુક ‘ પણ રોમેન્ટિક હતી , પણ તેમાં મુખ્ય પુરુષ કલાકાર સાથે મારો ખાસ સંબંધ નહોતો. પરંતુ આ વખતે તે સંપૂર્ણપણે રોમેન્ટિક લવ સ્ટોરી છે અને મને લાંબા સમય સુધી રાહ જોયા પછી તે કરવાની તક મળી.’ ‘ખરેખર, આ ફિલ્મ પહેલી વાર મને 2019 માં મળી હતી. તે સમયે તેના વિશે ચર્ચાઓ ચાલી રહી હતી, પણ પછી કોવિડ આવી ગયો. આનાથી ફિલ્માંકન મુશ્કેલ બન્યું. પરંતુ ‘ નોટબુક ‘ ફિલ્મ જોયા પછી , નિર્માતાઓને લાગ્યું કે હું આ ભૂમિકા માટે સંપૂર્ણપણે ફિટ રહીશ.’ ‘2023 ના અંતમાં, મને ફરીથી આ ફિલ્મ માટે સંપર્ક કરવામાં આવ્યો અને અમે તેને આગળ વધારવાનું નક્કી કર્યું. આ ફિલ્મનું શૂટિંગ આ વર્ષે શરૂ થવાની અપેક્ષા છે.’ હોલિવૂડ પ્રોજેક્ટનો ભાગ બન્યા પછી તમારા અભિગમમાં કોઈ ફેરફાર થયો? શું તેણે તમને એક એક્ટર તરીકે નવી રીતે વિચારવા માટે મજબૂર કરી? ‘જુઓ, આજકાલ ઇન્ડ્સ્ટ્રીની કોઈ મર્યાદા નથી. તમે જે પણ કામ કરો છો, તે કોઈને કોઈ પ્લેટફોર્મ પર લોકો સુધી પહોંચે છે. મારા માટે, આ ફક્ત ‘ હોલિવૂડ ડેબ્યૂ ‘ નથી પણ એક નવા અનુભવની તક છે. મારો વિચાર હંમેશા સરળ રહ્યો છે – તમે જે પણ પ્રોજેક્ટ કરો છો, તેને પૂરા હૃદય અને મહેનતથી કરો. હિન્દી સિનેમા હોય , તેલુગુ ઉદ્યોગ હોય કે હોલિવૂડ , સર્જનાત્મક ક્ષેત્રમાં ખરી ઓળખ તમારી ભાષાથી નહીં પણ તમારા પ્રદર્શનથી બને છે . જ્યારે તમે સત્ય અને પ્રામાણિકતા સાથે કોઈ પાત્ર ભજવો છો , ત્યારે તે પડદા પર પ્રતિબિંબિત થાય છે. આ સૌથી મહત્ત્વની વાત છે.’ શું તમને બોલિવૂડ અને હોલિવૂડની કાર્યપ્રણાલીમાં કોઈ ફરક લાગ્યો? ‘શૂટિંગ હજુ શરૂ થયું નથી, તેથી તેના વિશે વિગતવાર વાત કરવી થોડી વહેલી ગણાશે. પણ હા , સેટ પર પહેલો ટેક આવે કે તરત જ કેમેરા ફરે અને દૃશ્ય શરૂ થાય , પછી હું પોતે સમજી શકીશ કે કાર્યપ્રણાલીમાં શું તફાવત છે. પછી હું મારા અનુભવને વધુ સારી રીતે શેર કરી શકીશ.’ 2019 માં, તમે ફિલ્મ ‘નોટબુક’થી ડેબ્યૂ કર્યું. તમે તમારી અત્યાર સુધીની સફરને કેવી રીતે જુઓ છો? ‘જો હું પાછળ ફરીને જોઉં તો, આ છ વર્ષોએ મને એક એક્ટર અને એક માણસ બંને તરીકે ઘણું શીખવ્યું. જ્યારે મેં 2019 માં ડેબ્યૂ કર્યું, ત્યારે બધું નવું હતું , ઉર્જા એક અલગ જ સ્તરે હતી. પછી કોવિડ આવ્યો અને બધું બદલાઈ ગયું. અમારા બેચના નવા કલાકારોએ ખરેખર ઘણું મેનેજ કરી લીધું છે. અમે ખૂબ આશાવાદી હતા , પણ પછી અમારે કોવિડની અસરનો સામનો કરવો પડ્યો . કોવિડે ઉદ્યોગને, ખાસ કરીને કાસ્ટિંગને ભારે ફટકો માર્યો. ફિલ્મોમાં રોકાણ કરવા અને પૈસા કમાવવા અંગે એટલી બધી મૂંઝવણ હતી કે ઘણી બધી બાબતો બદલાઈ ગઈ. પણ એક વાત હંમેશા રહી છે તે છે સખત મહેનત. મને લાગે છે કે, અમારી બેચ થોડી દુર્લભ છે , કારણ કે અમે કોવિડ પહેલા અને કોવિડ પછી બંનેનો સામનો કર્યો છે. અમે સખત મહેનત કરી છે અને તે હંમેશા ચાલુ રહેશે. આ સફર સરળ નહોતી , પણ દરેક પડકાર સાથે મેં કંઈક નવું શીખ્યું .’ ‘નોંધનીય છે કે, ‘નોટબુક’ પછી, પ્રનૂતન 2021 માં ‘હેલ્મેટ’ અને 2024 માં ‘અમર પ્રેમ કી પ્રેમ કહાની’ માં જોવા મળી હતી.
