ટિકટોક સ્ટાર અલી, જેણે ડબલ મર્ડર કર્યાં:પત્નીની જાસૂસી કરીને ગોળી મારી, માતાને લાશના ફોટા મોકલી કહ્યું- મેં તેને મારી નાખી

‘મેં તેને મારી નાખી’ 21 ઓક્ટોબર, 2021, જ્યારે ટિકટોક સ્ટાર અલી અબૂલાબાને તેની માતા વારાને ફોન કરીને આ વાત કહી, ત્યારે તે કંપી ઊઠી. તેણે જવાબ આપ્યો, ‘આ મજાકની વાત નથી, આવું ન બોલ, આવી મજાક ન કર.’ જ્યારે માતાએ અલીની વાત માનવાનો ઇનકાર કર્યો, ત્યારે અલીએ ફોન કાપી નાખ્યો અને તેને કેટલાક ફોટા મોકલ્યા. અલીએ મોકલેલા ફોટામાં લોહીથી લથપથ બે મૃતદેહો દેખાયા. તેમાંથી એક લાશ અલીની પત્ની એનાની હતી. ફોટા જોતાં જ, વારા આઘાતથી જમીન પર પડી ગઈ અને ગભરાટમાં તેણે તરત જ બધા ફોટા ડિલિટ કરી નાખ્યા. દીકરાની વાત સાંભળ્યા પછી, તે તેની 5 વર્ષની પૌત્રી વિશે ચિંતિત થઈ ગઈ અને તરત જ તેને લેવા માટે શાળાએ ગઈ. થોડીવાર પછી, અલીએ 911 પર ફોન કર્યો અને મદદ માગી. તેણે કોલ પર કહ્યું – ‘ મારી પત્ની લોહીથી લથપથ પડી છે, તેની સાથે બીજો છોકરો પણ છે.’ જ્યારે હું ઘરે આવ્યો ત્યારે તે મૃત હાલતમાં મળી આવી. થોડીવારમાં, મેડિકલ ટીમ અને પોલીસ દરવાજો તોડીને એપાર્ટમેન્ટમાં પ્રવેશ્યા, ઘર સંપૂર્ણપણે અસ્તવ્યસ્ત હતું અને ત્યાં ખરેખર બે મૃતદેહો પડ્યા હતા, પરંતુ અલી ત્યાં નહોતો. અલીની પત્ની એના સાથે બીજી વ્યક્તિ કોણ હતી? જો અલીએ હત્યા કરી હોય તો તેણે 911 પર ફોન કેમ કર્યો? શું હતું તે હત્યા પાછળનું કારણ, જાણો આ વણકહી વાર્તાના 2 પ્રકરણોમાં- અલી અબૂલાબાનનો જન્મ 1992માં સ્ટેટન આઇલેન્ડમાં થયો હતો. તે માત્ર 17 વર્ષની ઉંમરે વાયુસેનામાં જોડાયો હતો. થોડા સમય પછી, તેને જાપાનના ઓકિનાવામાં પોસ્ટિંગ આપવામાં આવ્યું. અહીં તે એના મેરીને મળ્યો. સાથે સમય વિતાવતા, બંને એકબીજાને પસંદ કરવા લાગ્યા. 2014 માં, અલી અચાનક એરફોર્સની નોકરી છોડીને વર્જિનિયા જતો રહ્યો. બીજી બાજુ, એના પણ નોકરી છોડીને ફિલિપાઇન્સ પોતાના ઘરે પાછી ફરી. અહેવાલો અનુસાર, એક દિવસ વાયુસેનામાં કામ કરતી વખતે, અલીએ ફરજ પર હાજરી દરમિયાન એના પર હાથ ઉપાડ્યો હતો, જેના કારણે બંનેને નોકરીમાંથી કાઢી મૂકવામાં આવ્યા. આ ઘટના પછી, બંને અલગ થઈ ગયા. થોડા દિવસો પછી, જ્યારે અલીને ખબર પડી કે એના પ્રેગ્નેન્ટ છે, ત્યારે તેણે એનાને વર્જિનિયા બોલાવી અને તેની સાથે લગ્ન કર્યા. 2015 માં, એનાએ એક પુત્રી, અમીરાને જન્મ આપ્યો. અલી અબૂલાબાન સોશિયલ મીડિયા સ્ટાર બન્યો બેરોજગાર થયા પછી, અલીએ 2019 માં સોશિયલ મીડિયા પર સામગ્રી પોસ્ટ કરવાનું શરૂ કર્યું. યુટ્યુબ, ઇન્સ્ટાગ્રામ અને ટિકટોક પર તેનું યુઝરનેમ ‘Jinnkid’ હતું, જેમાં તે ટૂંક સમયમાં સેલિબ્રિટીઓની નકલ કરીને લોકપ્રિય બન્યો. થોડા સમય પછી, તેણે તેની પત્ની એનાને પણ તેના વીડિયોમાં બતાવવાનું શરૂ કર્યું. જ્યારે ચાહકોને તેમના અંગત જીવનમાં વધુ રસ પડ્યો, ત્યારે તેમણે તેમના લગ્ન જીવન અને રોજિંદા મુદ્દાઓ પર વીડિઓઝ બનાવવાનું શરૂ કર્યું, જેનો તેને ખરેખર ફાયદો થયો. અલી તેની પત્નીની વધતી જતી લોકપ્રિયતાથી ઈર્ષ્યા કરવા લાગ્યો વર્ષ 2021માં, બંને સાન ડિએગો શિફ્ટ થયા અને એનાએ સોશિયલ મીડિયા પર કન્ટેન્ટ બનાવવાનું પણ શરૂ કર્યું. જેમ જેમ એનાની લોકપ્રિયતા વધતી ગઈ, તેમ તેમ તેમના લગ્નજીવનમાં પણ સંઘર્ષો વધવા લાગ્યા. એના અને અલીના ચાહકો પણ આ ઝઘડાના સાક્ષી હતા. લાઈવ સ્ટ્રીમિંગ દરમિયાન અલી ઘણીવાર તેની પત્ની સાથે ઝઘડો કરતો અને તેની સાથે દુર્વ્યવહાર કરતો. એના નજીકના લોકોના મતે, અલીને તેની પત્નીની લોકપ્રિયતાથી ઈર્ષ્યા થઈ અને તે શંકાશીલ બન્યો. પરિણામે, ઝઘડા એટલા વધી ગયા કે અલીએ તેને મારવાનું શરૂ કર્યું. લાઈવ સ્ટ્રીમિંગ દરમિયાન, અલી એના પર છેતરપિંડીનો આરોપ લગાવતો હતો. અલીને શંકા હતી કે એના તેની સાથે વિશ્વાસઘાત કરી રહી છે. દરેક ઝઘડા પછી એના અલી સાથે છૂટાછેડા વિશે વાત કરતી, જોકે દર વખતે તે તેની માફી માગતો અને પરિસ્થિતિ સુધારતો. ઘણી વાર માફ કર્યા પછી પણ જ્યારે અલીના વર્તનમાં કોઈ સુધારો ન થયો, ત્યારે એનાએ તેના મિત્રોને ઘરેલુ હિંસાની ફરિયાદ કરી, પરંતુ તેને ઘરેલુ મામલો માનીને તેની ફરિયાદને અવગણવામાં આવી. એના અલીને છૂટાછેડા આપવા માગતી હતી. ઓક્ટોબર 2021માં, જ્યારે અલીએ એનાને એટલી નિર્દયતાથી મારી કે તેનો ખભો તૂટી ગયો. આ ઘટના પછી, એનાએ છૂટાછેડા લેવાનું નક્કી કર્યું. ઓક્ટોબર 2021 માં, અલી સ્પાયર સાન ડિએગો બિલ્ડીંગમાં તેના 35મા માળના એપાર્ટમેન્ટમાંથી નીકળીને મિડ બે હોટેલમાં રહેવા ગયો. જ્યારે એના અને તેની પુત્રી અમીરા એપાર્ટમેન્ટમાં જ રહેતા હતા. 21 ઓક્ટોબરના રોજ, એના અને તેના મિત્રના મૃતદેહ આ જ એપાર્ટમેન્ટમાંથી મળી આવ્યા હતા. દીકરીને કહ્યું હતું – મેં તારી મમ્મીને ઈજા પહોંચાડી છે અલીએ 911 પર ફોન કર્યા બાદ પોલીસ એપાર્ટમેન્ટમાં પહોંચી. કલાકો પછી, અલીની તેની પુત્રી અમીરાની શાળાએ જતા રસ્તામાં ધરપકડ કરવામાં આવી. ધરપકડ પહેલાં તેણે તેની 5 વર્ષની પુત્રીને કહ્યું હતું કે, મેં તારી મમ્મીને ઈજા પહોંચાડી છે. ધરપકડના થોડા સમય પછી, અલીએ તેની પત્ની એના અને તેમના મિત્ર રેબર્ન બેરનની હત્યા કર્યાની કબૂલાત કરી. તેની કબૂલાત મુજબ, તે એના સાથેના સંબંધો સુધારવા માગતો હતો, પરંતુ તેને શંકા હતી કે તે તેની સાથે વિશ્વાસઘાત કરી રહી છે. હત્યાના થોડા કલાકો પહેલા, અલીએ એનાને ગુલાબ અને ઘરવખરીની વસ્તુઓ મોકલી હતી. થોડા સમય પછી, તે એનાની પ્રતિક્રિયા જોવા માટે એપાર્ટમેન્ટમાં પહોંચ્યો. ત્યાં પહોંચીને તેણે જોયું કે મોકલેલો બધો સામાન ઘરના દરવાજા પર પડેલો હતો. આ જોઈને તે ડુપ્લિકેટ ચાવીઓની મદદથી ઘરમાં પ્રવેશ્યો. જ્યારે અંદર ગયો ત્યારે જોયું કે ગુલાબના ફૂલો સંપૂર્ણપણે તૂટેલા હતા. તેણે એપાર્ટમેન્ટમાંથી એનાને ફોન કર્યો અને પૂછ્યું કે તે ક્યાં છે, જેના જવાબમાં એનાએ કહ્યું કે તે એપાર્ટમેન્ટમાં છે. એનાના જૂઠાણાને કારણે અલી ગુસ્સે થઈ ગયો અને આખા ઘરમાં તોડફોડ કરવા લાગ્યો. તેણે તેની પત્નીનો સામાન ફેંકી દીધો અને ફર્નિચરને પણ નુકસાન પહોંચાડ્યું. એનાના જૂઠાણા તેની શંકાઓને સાચી ઠેરવવા લાગ્યા હતા.આ શંકાને મજબૂત બનાવવા માટે, તેણે તેની જાસૂસી કરવાની અને તેને રંગે હાથે પકડવાની યોજના બનાવી. પત્નીની જાસૂસી કર્યા બાદ હત્યા અલીએ પુત્રી અમીરાના આઈપેડ પર એક એપ ડાઉનલોડ કરી, જેની મદદથી તે હોટલના રૂમમાં બેસીને પણ ઘરના અવાજો સાંભળી શકતો હતો. એપ ડાઉનલોડ કરીને તરત જ તે ઘરેથી નીકળી ગયો અને હોટેલમાં આવી ગયો અને એપ ખોલીને અવાજો સાંભળવા લાગ્યો. થોડા સમય પછી, જ્યારે એના ઘરે પાછી આવી, ત્યારે ઘરની હાલત જોઈને તેણે તેના મિત્રને ફોન કરીને કહ્યું કે અલીએ ઘરમાં તોડફોડ કરી છે. તેની દીકરી ઘરે પાછી આવે તે પહેલાં તેણે ઘરની હાલત સુધારવી પડશે. એનાએ તેના મિત્રને તેની પુત્રીને સ્કૂલેથી લેવા કહ્યું. તેણે એમ પણ કહ્યું કે તે ટૂંક સમયમાં કોર્ટમાંથી અલી વિરુદ્ધ પ્રતિબંધનો આદેશ લેશે. અલી તેના હોટલના રૂમમાંથી એનાના આ બધા શબ્દો સાંભળી રહ્યો હતો. મૃત્યુ પહેલાં, એનાએ તેના મિત્રને ઘરે બોલાવ્યો હતો. થોડી વાર પછી એનાએ ફરીથી ફોન કર્યો. તેણે તે ફોન તેના મિત્ર રેબર્ન બેરનને કર્યો. એનાએ તેને ઘરે આવીને મદદ કરવા કહ્યું. એનાએ રેબર્નને ઘરે આમંત્રણ આપતાંની સાથે જ અલીનો ગુસ્સો વધુ વધી ગયો, કારણ કે તેને યાદ આવ્યું કે ઘણી વાર રેબર્ન તેની પત્ની એના સાથે તેની સામે જ ફ્લર્ટ કરી ચૂક્યો હતો. તેણે માની લીધું કે તે બંને તેની સાથે છેતરપિંડી કરી રહ્યા છે. તે તરત જ બંદૂક લઈને એપાર્ટમેન્ટ તરફ રવાના થયો’. એપાર્ટમેન્ટમાં પહોંચ્યા પછી, અલીએ એના અને રેબર્નને સોફા પર જોયા અને ચીસો પાડવા લાગ્યો. બંને વચ્ચે ઉગ્ર બોલાચાલી થઈ, જે દરમિયાન અલીએ પોતાના ખિસ્સામાંથી બંદૂક કાઢી અને એનાના માથામાં ગોળી મારી દીધી. એના તરત જ મૃત્યુ પામી. જ્યારે રેબર્ન ચીસો પાડવા લાગ્યો, ત્યારે અલીએ તેના પર ઘણા રાઉન્ડ ફાયરિંગ કર્યું. જેમાં તેનું પણ મોત થયું. સુનાવણી દરમિયાન, તેણે પોતાનો બચાવ કરતા કહ્યું કે તેણે તેની પત્ની અને તેના મિત્રને ગોળી માર્યા પછી તરત જ 911 પર ફોન કર્યો કારણ કે તે તેમને બચાવવા માગતો હતો. જ્યારે પોલીસ તપાસ મુજબ, હત્યા પછી તરત જ અલીએ તેની માતાને ફોન કરીને હત્યા વિશે જાણ કરી અને મૃતદેહોના ફોટા મોકલ્યા. એપાર્ટમેન્ટ કોરિડોરના સીસીટીવી ફૂટેજમાં તેનો અવાજ પણ રેકોર્ડ થયો હતો. ફૂટેજ મુજબ, અલીએ પાંચ ગોળીબાર કર્યા અને તે પછી તરત જ તેની માતાને ફોન કરીને આ વિશે જાણ કરી. સુનાવણી દરમિયાન, અલીની માતાએ પણ સ્વીકાર્યું કે હત્યા પછી તરત જ તેને ફોટોગ્રાફ્સ મોકલવામાં આવ્યા હતા, જે કોર્ટમાં પણ રજૂ કરવામાં આવ્યા હતા. અલીની માતાએ તેનો બચાવ કરતા કહ્યું કે અલીનો જન્મ ત્યારે થયો હતો જ્યારે તે માત્ર 15 વર્ષની હતી. આ પછી, તેણે લગ્ન કર્યા અને થોડા વર્ષોમાં તેને વધુ 2 બાળકો થયાં. અલીના પિતા તેની સાથે ખૂબ જ કડક હતા અને તેને ખૂબ માર મારતા હતા. ઘરમાં રોજિંદા ઝઘડાઓની અલી પર ખરાબ અસર પડતી. તેનું વર્તન બીજા બાળકો કરતા તદ્દન અલગ હતું. તે જીદ્દી અને ચીડિયો બની ગયો હતો. 17 વર્ષની ઉંમરે, અલીને ADHD (એટેન્શન ડેફિસિટ હાઇપરએક્ટિવિટી ડિસઓર્ડર) હોવાનું નિદાન થયું, જેના માટે તેની સારવાર પણ કરવામાં આવી. તેની માતાએ કહ્યું કે જ્યારે તે વાયુસેનામાં ભરતી થયો ત્યારે પરિવાર ખુશ હતો કે તેનું જીવન હવે સામાન્ય થઈ જશે. ડબલ મર્ડર કેસની સુનાવણી દરમિયાન, અલીના ડોક્ટરોએ જણાવ્યું હતું કે અલીએ વર્ષ 2021 માં ઘણી વખત બ્રેકડાઉન થયા બાદ તબીબી મદદ માંગી હતી, પરંતુ તેને યોગ્ય સહાય આપવામાં આવી ન હતી. આજીવન કેદની સજા સાંભળ્યા પછી અલી તાળીઓ પાડી રહ્યો હતો બધી દલીલો છતાં, જૂન 2021 માં, અલીને બેવડી હત્યાનો દોષી ઠેરવવામાં આવ્યો અને તેને આજીવન કેદની સજા ફટકારવામાં આવી. આ સમય દરમિયાન, અલી સતત તાળીઓ પાડી રહ્યો હતો અને અપશબ્દોનો ઉપયોગ કરી રહ્યો હતો. અલીએ ચુકાદો આપનારા ન્યાયાધીશ સામે પણ અપશબ્દોનો ઉપયોગ કર્યો. ચુકાદામાં, ન્યાયાધીશે એમ પણ કહ્યું કે તેમના કેસમાં પેરોલનો કોઈ અવકાશ રહેશે નહીં. ફેબ્રુઆરી 2025 માં, અલીએ તેની આજીવન કેદની સજામાં ફેરફાર કરવાની માંગ કરી. 2024માં અલીના જીવન અને આ ડબલ મર્ડર પર એક દસ્તાવેજી ફિલ્મ ‘ટિક ટોક મર્ડર’ રિલીઝ થઈ હતી. આ ડોક્યુમેન્ટરીમાં એવા ફૂટેજ પણ શામેલ છે જેમાં અલી લાઇવ સ્ટ્રીમિંગ દરમિયાન એના સાથે દુર્વ્યવહાર કરતો જોઈ શકાય છે.