ચિંતેશ વ્યાસ માર્ચની શરૂઆત સાથે ઉત્તરના પહાડી વિસ્તારોમાં વેસ્ટર્ન ડિસ્ટબન્સના કારણે થઇ રહેલી હિમવર્ષા અને વરસાદના કારણે રાજ્યમાં ઠંડી અનુભવાઇ હતી. ઉત્તરના ઠંડા હેમ પવનના કારણે બુધવારે રાજ્યનાં 16 શહેરોના લઘુત્તમ તાપમાનમાં 1 ડિગ્રીથી લઇ 12.8 ડિગ્રી સુધીનો ઘટાડો નોંધાયો હતો. એમાં પણ 13 શહેરોનું લઘુત્તમ તાપમાન 3 ડિગ્રી વધુ તૂટ્યું હતું. જેમાં કચ્છના નલિયા શહેરના લઘુત્તમ તાપમાનમાં 12.8 ડિગ્રીના ઘટાડા સાથે ઠંડીનો પારો 6.2 ડિગ્રી નોંધાયો હતો. ઉનાળાના આરંભમાં નલિયાની રાજ્યમાં માર્ચ મહિનાના ઠંડીના બે રેકોર્ડ સર્જ્યા છે. એક તો નલિયાના 67 વર્ષના ઇતિહાસમાં આ સૌથી ઠંડી રાત રહી. જ્યારે બીજો રેકોર્ડ માર્ચ મહિનામાં રાજ્યની ત્રીજી સૌથી વધુ ઠંડીનો રેકોર્ડ બન્યો છે. આ અગાઉ 9 માર્ચ, 1979 ના રોજ ભૂજમાં ઠંડીનો પારો 5.5 ડિગ્રી નોંધાયો હતો. જ્યારે 30 માર્ચ, 1905 ના રોજ રાજકોટમાં 6.1 ડિગ્રી તાપમાન નોંધાયું હતું. આ બંને શહેરોના ઠંડીના રેકોર્ડ રાજ્યની માર્ચ મહિનાના સૌથી નીચા તાપમાનનો રેકોર્ડ છે. જે હજુ સુધી તૂટી શક્યા નથી. 24 કલાક બાદ દિવસ-રાતના તાપમાનમાં 3થી
5 ડિગ્રીનો વધારો થશે { હવામાન વિભાગની આગાહી મુજબ, ગુરુવારે દિવસ-રાતના તાપમાનમાં કોઇ મોટો ફેરફાર થવાની શક્યતા નથી. ત્યાર બાદ ઉત્તર દિશાના નીચા સ્તરના ઠંડા પવન નબળા પડશે. જેને લઇ દિવસ-રાતના તાપમાનમાં પણ 3 થી 5 ડિગ્રીનો વધારો થશે. આ દરમિયાન રાજ્યના મોટાભાગના શહેરોમાં ગરમીનો પારો 35 ડિગ્રી પાર, જ્યારે ઠંડીનો પારો 20 ડિગ્રી પાર રહેતાં ગરમીની શરૂઆત થશે. સમગ્ર ગુજરાતમાં પ્રસિદ્ધ ‘કેસર કેરી’ માટે જાણીતા કચ્છના ખેડૂતો ભારે ચિંતામાં મૂકાયા છે. આંબાના ઝાડ પર મોર (ફૂલ) આવતા જ કાળા પડી જતાં અને સુકાઇ રહ્યા છે. ખેડૂતો ફરિયાદ કરી રહ્યા છે કે આંબાના ઝાડ પર મોર તો આવ્યાં, પણ એક સપ્તાહમાં જ કાળા પડવા લાગ્યા. એકાએક વાવાવરણ બદલાયું છે. થોડા દિવસ ઝાકળ બાદ બે દિવસથી પવન ફૂંકાયો અને ઠંડી વધી છે. તો બીજી બાજુ મોરમાં રોગ પણ દેખાયો છે.
રાજ્યમાં માર્ચની ઠંડીના બે રેકોર્ડ:નલિયાનું લઘુત્તમ તાપમાન 12.8 ડિગ્રી ઘટતાં 6.2 ડિગ્રી સાથે માર્ચની ‘ઠંડીનો રેકોર્ડ’ તોડ્યો
