રાજપીપળાની શ્રીકૃષ્ણ મિરેકલ હવેલીએ સમાજ સેવાની અનોખી પહેલ કરી છે. હવેલી ખાતે દર એકાદશીના દિવસે દાન મેળાનું આયોજન કરવામાં આવે છે. આ મેળામાં જરૂરિયાતમંદ લોકોને જીવન જરૂરિયાતની વિવિધ વસ્તુઓ મફતમાં આપવામાં આવે છે. મિરેકલ હવેલીના એનઆરઆઈ સંચાલક અસિત બક્ષીના જણાવ્યા અનુસાર, દાન મેળામાં આવનાર દર્શનાર્થીઓ અને જરૂરિયાતમંદોને કુપન આપવામાં આવે છે. આ કુપન દ્વારા તેઓ મેળામાં લાગેલા કોઈપણ એક સ્ટોલ પરથી વસ્તુ મેળવી શકે છે. મેળામાં ઘરવખરી, કપડાં, વાસણ, અનાજ, તેલ, ક્રોકરી જેવી રોજિંદા વપરાશની વસ્તુઓ ઉપલબ્ધ છે. જીન્સ પેન્ટ અને ચણિયાચોળી જેવા મોંઘા કપડાં પણ મફતમાં આપવામાં આવે છે. ગત મહિને યોજાયેલા મેળામાં 200થી વધુ લોકોએ વિવિધ વસ્તુઓ મફત મેળવી હતી. હવેલીની ટીમ હવે ગામડાઓમાં જઈને જરૂરિયાતમંદ લોકોને શોધીને મેળામાં લાવવાની યોજના ધરાવે છે. કોઈપણ સજ્જન દાન આપવા ઇચ્છે તો તે સ્વીકારવામાં આવે છે અને તે રકમમાંથી મેળા માટે વસ્તુઓ ખરીદવામાં આવે છે. મિરેકલ હવેલીના એનઆરઆઈ સંચાલક અસિત બક્ષીના મતે આ સમાજ સેવાનો એક નાનકડો પ્રયાસ છે, જે ભગવાનની કૃપાથી આગળ વધશે.
