IPL શરૂ થવાને હવે ગણતરીના દિવસો બાકી રહ્યા છે. 22મી માર્ચથી શરૂ થઈ રહેલી આઈપીએલમાં અલગ-અલગ ટીમો મેદાનમાં ઉતરવા માટે તૈયાર છે. દેશ-વિદેશના ક્રિકેટરોને IPLમાં રમતા જોવા માટે ક્રિકેટપ્રેમીઓ પણ અતિ ઉત્સાહિત પણ છે. પરંતુ લોકોને ખબર નહીં હોય કે, IPL રમનાર તમામ ક્રિકેટરો સુરતના ફેબ્રિકમાંથી તૈયાર જર્સી અને ટ્રેકપેન્ટમાં જોવા મળશે. આ ખાસ જ્યુરીક મટિરિયલમાંથી તૈયાર કરવામાં આવે છે, જે પોલિસ્ટર કાપડ હોય છે અને પોલિસ્ટર બનાવવામાં સુરત હબ છે. ખાસ IPLના કારણે સુરતના વેપારીઓને 75 કરોડ રૂપિયાનો વેપાર મળ્યો છે. IPLના ખેલાડીઓના જે ડ્રેસ બને છે તેના કાપડ ઉપરાંત દર્શકો મેદાનમાં જે જર્સી પહેરીને જતા હોય છે તે જર્સીનું કાપડ પણ સુરતમાં જ તૈયાર થાય છે. ખેલાડીઓ માટે બનાવવામાં આવતા ડ્રેસનું કાપડ અનેક વિશેષતા ધરાવે છે. સુરતમાં બનેલા કાપડમાંથી તૈયાર થશે ખેલાડીઓની જર્સી
IPLની લોકો આતુરતાથી રાહ જોઈ રહ્યા છે. IPL ના ખેલાડીઓ જે જર્સી અને ટ્રેકપેન્ટ પહેરશે, તે સુરતના પોલિસ્ટર ફેબ્રિકમાંથી તૈયાર કરવામાં આવ્યું છે. જેની ખાસિયત સાંભળીને તમે પણ આશ્ચર્યમાં મુકાઈ જશો. દેશમાં યોજાનાર પ્રીમિયર લીગમાં સુરતનું યોગદાન ખૂબ જ મહત્વનું છે. IPLમાં જે પણ કાપડ વાપરવામાં આવે છે, તે ભલે ક્રિકેટરો પહેરે કે તેમના ચાહકો, તે પોલિસ્ટર કાપડ હોય છે. સુરતના પોલિસ્ટર કાપડથી તૈયાર જર્સી અને ટ્રેકપેન્ટ દેશ-વિદેશના IPLના ખેલાડીઓ પહેરશે. સુરતમાં તૈયાર થતા કાપડની વિશેષતા
એની ખાસિયતની વાત કરવામાં આવે તો, આ એક લાઈટ વેઇટ ફેબ્રિક હોય છે. ડ્રાય-ફિટ હોવાની સાથે યુવી પ્રોટેક્ટેડ હોય છે. ખેલાડીઓ જ્યારે રમે છે, ત્યારે તેમના મૂવમેન્ટને ધ્યાનમાં રાખીને આ કાપડ ખૂબ જ સ્ટ્રેચેબલ બનાવવામાં આવે છે. અગાઉ આ કાપડ ચીનમાંથી ઈમ્પોર્ટ કરવામાં આવતું હતું, પરંતુ સરકારના નવા નિયમ બાદ આ સંપૂર્ણ રીતે ઈમ્પોર્ટ બંધ થઈ ગયું છે. જેના કારણે કાપડ ઉદ્યોગને લાભ પણ થયો છે. પહેલાં આ કાપડ ચીનમાંથી રોજ 835 ટન આવતું હતું, પરંતુ હવે સુરતમાં આ ફેબ્રિક તૈયાર થવાને કારણે માત્ર IPL સિઝનમાં ₹75 કરોડ રૂપિયાનો વેપાર સુરતના અલગ-અલગ વેપારીઓને મળ્યો છે. કાપડમાં રિસાયકલ મટિરિયલનો પણ ઉપયોગ
સુરતના પોલિસ્ટરના ઉદ્યોગપતિ વિષ્ણુ અગ્રવાલે જણાવ્યું હતું કે, ખાસ કરીને જે પ્લાસ્ટિકની બોટલ સહિતની વસ્તુઓ છે, તેને રિસાયકલ કરીને યાર્ન બનાવવામાં આવે છે, અને યાર્ન પછી ભાગો બનાવીને પોલિસ્ટર બનાવવામાં આવી રહ્યું છે. એટલે IPLમાં જે પણ ખેલાડીઓ રમવા જઈ રહ્યા છે, તે રિસાયકલ પોલિસ્ટરમાંથી બનાવવામાં આવ્યું છે. તેમણે વધુમાં જણાવ્યું હતું કે, IPLમાં રમનાર ખેલાડીઓ માટે સુરતથી પોલિસ્ટર કાપડ અલગ-અલગ શહેરોની કંપનીઓને આપવામાં આવ્યું છે. તેનું મટિરિયલ અલગ હોય છે, પણ સાથે IPL અને ખેલાડીઓના ચાહકો માટે પણ ટીશર્ટ બનાવવામાં આવે છે. બંનેની ક્વોલિટી અને કિંમતમાં પણ ખાસો તફાવત જોવા મળે છે. સુરતમાં પોલિસ્ટર ફેબ્રિક સાથે સંકળાયેલા વેપારીઓ અને યુનિટની સંખ્યામાં પણ વધારો નોંધાયો છે. એક વર્ષ પહેલાં જ્યાં 3,500 મશીનરી હતી, ત્યાં એક વર્ષની અંદર આ ઇન્ડસ્ટ્રીમાં 5500 જેટલી મશીનો થઈ ગઈ છે. બીજી બાજુ, 235 જેટલા યુનિટ પોલિસ્ટર કાપડ માટે છે. યુવી પ્રોટેકશન
આ ફેબ્રિક તાપમાનને સંતુલિત રાખે છે. બધા જાણે છે કે હાલ ગરમી ચાલી રહી છે, ત્યારે IPLમાં રમનાર ખેલાડીઓ પરસેવાથી હેરાન-પરેશાન થઈ શકે છે. પરંતુ આ ફેબ્રિકના કારણે તેઓ 50° સુધીની ગરમીમાં આરામથી રમી શકે છે, કારણ કે આ ફેબ્રિક ગરમીમાં પણ ઠંડકનો અનુભવ કરાવે છે. ફેબ્રિક પર ખાસ કેમિકલ હોય છે, જેના કારણે તાપમાનને સંતુલિત રાખી શકાય છે. ક્વિક ડ્રાય ફેબ્રિક
આ ફેબ્રિકમાં ખાસ તંતુઓ વપરાયા છે, જેના કારણે ભેજ અથવા તો પાણી તેને ઝડપથી શોષી લે છે. પરસેવો હોય તો તરત જ સુકાઈ જાય છે, જેના કારણે આ ફેબ્રિક વજનદાર અને ભીનું રહેતું નથી અને ખેલાડીઓ આરામથી રમી શકે છે. એન્ટીમાઈક્રોબિયલ
આ ફેબ્રિકમાં બેક્ટેરિયા અને ફંગસના વિકાસને અટકાવવાના ગુણધર્મો છે, જેના કારણે ફેબ્રિક પર જીવાણુઓ ટકી શકતા નથી. આ ફેબ્રિક સ્વચ્છ અને આરોગ્યપ્રદ છે. દુર્ગંધ મુક્ત હોય છે
આ ફેબ્રિક દુર્ગંધ પેદા કરતી જીવાણુઓ અને બેક્ટેરિયાને દૂર રાખે છે. સતત પરસેવો અને ભેજ હોવા છતાં પણ ફેબ્રિક તાજગીભર્યું રહે છે. તે લાંબા સમય સુધી પહેર્યા પછી પણ અપ્રિય ગંધ અનુભવાતી નથી.
સુરતના કાપડમાંથી તૈયાર થશે IPL ખેલાડીઓના ડ્રેસ:UV પ્રોટેક્ટેડ, સ્ટ્રેચેબલ કાપડ 50 ડિગ્રી ગરમીમાં પણ રાહત આપે, ખેલાડીઓ માટે ખાસ કાપડ શા માટે?
