કોમેડીનો બાદશાહ કપિલ શર્મા આજે દરેક ઘરમાં લોકપ્રિય છે. લોકોના ચહેરા પર હાસ્ય અને ખુશી લાવનાર કપિલ શર્મા આજે ભલે મોટો સ્ટાર બની ગયો હોય, પરંતુ એક સમય એવો હતો, જ્યારે તેને કામ મેળવવા માટે ઘણો સંઘર્ષ કરવો પડતો હતો. કપિલ શર્માથી લઈને કોમેડી કિંગ બનવા સુધીની તેની સફર મુશ્કેલીઓથી ભરેલી હતી, પરંતુ તે કોઈપણ પરિસ્થિતિમાં પોતાના સપના પૂરા કરવા માટે મક્કમ હતો. સફળતાના શિખર પર પહોંચ્યા પછી, કપિલ શર્માના જીવનમાં એક એવો સમય આવ્યો, જ્યારે તે હતાશા અને એંગ્ઝાઈટિનો શિકાર બની ગયો, એટલે સુધી કે તે આત્મહત્યા કરવાનું વિચારવા લાગ્યો હતો. ત્યારે શાહરૂખ ખાને તેની કાઉન્સેલિંગ કરી હતી. પોતાની જરૂરિયાતો પૂરી કરવા માટે નાનપણથી જ કામ કરવાનું શરૂ કર્યું કપિલ શર્માના પિતા જીતેન્દ્ર કુમાર શર્મા પંજાબ પોલીસમાં હેડ કોન્સ્ટેબલ હતા. તેમ છતાં તેનું બાળપણ ખૂબ જ મુશ્કેલીઓમાં પસાર થયું. તે નાનો હતો, ત્યારે તે ટેલિફોન બૂથ પર કામ કરીને દર મહિને 500 રૂપિયા કમાતો હતો. ત્યારબાદ, જ્યારે તે થોડો મોટો થયો, ત્યારે તેણે 900 રૂપિયા પ્રતિ માસના પગારે કાપડ મિલમાં કામ કરવાનું શરૂ કર્યું. કપિલ આ બધું કામ પોતાની જરૂરિયાતો પૂરી કરવા માટે કરતો હતો, પરંતુ જ્યારે તેના પિતાનું અવસાન થયું, ત્યારે તેના પર એટલી બધી જવાબદારીઓ આવી ગઈ કે તે પૈસા કમાવવા માટે દિવસ-રાત કામ કરવા લાગ્યો. પિતાના મૃત્યુ માટે પ્રાર્થના કરતો હતો કપિલ શર્માના પિતાનું 2004માં કેન્સરથી અવસાન થયું હતું. કપિલ શર્માએ એક ઈન્ટરવ્યૂ દરમિયાન કહ્યું હતું કે, તેના પિતાને કેન્સરના કારણે પીડાતા જોઈને તે ભગવાનને પ્રાર્થના કરતો હતો કે ભગવાન તેના પિતાને પોતાની પાસે બોલાવી લે. તે સમયે કપિલ પાસે પોતાનું ઘર પણ નહોતું. તે અમૃતસરમાં ભાડાના ઘરમાં રહેતો હતો. આશ્રિતની નોકરી નકારી કાઢી કમ્પેશનેટ એપોઇન્ટમેન્ટ (Compassionate Appointment)એ એક સિસ્ટમ છે, જે હેઠળ સરકારી અથવા જાહેર ક્ષેત્રની સંસ્થાઓ કર્મચારીના મૃત્યુ પછી તેના પરિવારના સભ્યને નોકરી આપે છે. પિતાના અવસાન પછી, કપિલ શર્માને તેમના સ્થાને કોન્સ્ટેબલની નોકરીની ઓફર કરવામાં આવી હતી પરંતુ તેણે આ નોકરી ઠુકરાવી દીધી હતી. બાદમાં આ નોકરી તેના મોટા ભાઈ અશોક કુમાર શર્માએ લીધી, જે પંજાબ પોલીસમાં કોન્સ્ટેબલ છે. શેરીમાં પિતાએ માર માર્યો હતો કપિલ શર્માએ એક ઈન્ટરવ્યૂ દરમિયાન જણાવ્યું હતું કે, બાળપણમાં તેના પિતાએ તેને પડોશમાં બધાની સામે માર માર્યો હતો. કપિલ શર્માએ કહ્યું કે, જ્યારે હું 15 વર્ષનો હતો, ત્યારે મારા પિતા તેમના મિત્ર સાથે પોલીસ જીપમાં આવ્યા હતા. તેણે ગાડીની ચાવીઓ ટેબલ પર મૂકી દીધી. તે તેમના મિત્ર સાથે બેસીને દારૂ પી રહ્યા હતા. હું બરફ આપવાના બહાને ત્યાં ગયો અને ત્યાંથી ચાવી લઈ લીધી. મને બિલકુલ ગાડી ચલાવતા આવડતી ન હતી છતાં મેં જીપ ચાલુ કરી. જીપ ચાલુ થતાં જ શાકભાજી વેચનારની લારી સાથે અથડાઈ ગઈ. લારી પર રાખેલા બધા શાકભાજી હવામાં ઉડીને નીચે પડી. હું શાકભાજી ઉપાડતો જ હતો ત્યાં સુધીમાં મારા પિતા આવ્યા અને મને મારવા લાગ્યા. તે સમયે આખો વિસ્તાર મને માર ખાતો જોઈ રહ્યો હતો. પહેલા ઓડિશનમાં જ રિજેક્ટ થયો ‘ધ ગ્રેટ ઇન્ડિયન લાફ્ટર ચેલેન્જ-3’ જીત્યા પછી કપિલ શર્માનું નસીબ બદલાઈ ગયું પરંતુ જ્યારે લાફ્ટર ચેલેન્જનું ઓડિશન અમૃતસરમાં થયું, ત્યારે તેને રિજેક્ટ કરવામાં આવ્યો. તે પછી તેના એક મિત્રની સલાહથી તેણે ફરીથી દિલ્હીમાં ઓડિશન આપ્યું અને તેની પસંદગી થઈ. કપિલ આ શોનો વિજેતા પણ હતો, તેણે 10 લાખ રૂપિયાની ઈનામી રકમ જીતી હતી, જેનાથી તેણે તેની બહેન પૂજાના લગ્ન કરાવ્યા હતા. લાફ્ટર ચેલેન્જે નસીબ ખોલ્યું ‘ધ ગ્રેટ ઇન્ડિયન લાફ્ટર ચેલેન્જ-3’ જીત્યા પછી કપિલ શર્માનું નસીબ ખુલ્યું. આ પછી તે કોમેડી સર્કસમાં આવ્યો અને પછી પોતાનું પ્રોડક્શન ‘હાઉસ K9’ ખોલ્યું. તેણે કલર્સ ચેનલ સાથે હાથ મિલાવ્યો અને પોતાનો શો ‘કોમેડી નાઇટ્સ વિથ કપિલ’ શરૂ કર્યો. થોડા જ દિવસોમાં શો ટોચ પર પહોંચી ગયો અને કપિલ શર્મા વિશ્વના શ્રેષ્ઠ હાસ્ય કલાકારોમાંનો એક બની ગયો. કપિલ શર્મા ડિપ્રેશનનો શિકાર થયો હતો કપિલ શર્માના જીવનમાં એક સમય એવો આવ્યો, જ્યારે તે ડિપ્રેશનનો શિકાર બન્યો. નાના પડદા પર પ્રખ્યાત થયા પછી, કપિલ શર્મા મોટા પડદા પર પણ પોતાની ઓળખ બનાવવા માંગતો હતો. ‘ભાવનાઓ કો સમજા કરો’ અને ‘ABCD 2’ જેવી ફિલ્મોમાં નાના-મોટા રોલ કર્યા બાદ કપિલ શર્મા ડિરેક્ટર અબ્બાસ-મસ્તાનની ફિલ્મ ‘કિસ કિસ કો પ્યાર કરું’માં લીડ રોલમાં જોવા મળ્યો હતો. આ ફિલ્મ પછી, કપિલ શર્માએ 2017માં હિન્દી ફિલ્મ ‘ફિરંગી’ અને 2018 માં પંજાબી ફિલ્મ ‘સન ઓફ મનજીત સિંહ’ પ્રોડ્યૂસ કરી હતી. ફ્લોપ ફિલ્મો પછી તેનું દેવાળું ફૂંકાઈ ગયું કપિલ શર્માએ પોતે ‘ફિરંગી’માં અભિનય કર્યો હતો, જ્યારે પંજાબી ફિલ્મનો ફક્ત પ્રોડ્યૂસર હતો. આ ફિલ્મો ફ્લોપ થયા પછી કપિલ શર્મા નાદાર થઈ ગયો. તેનું બેંક બેલેન્સ શૂન્ય થઈ ગયું હતું. આ કારણે તે ડિપ્રેશનમાં જતો રહ્યો. તેની પત્ની ગિન્નીએ તેને આ હતાશા દૂર કરવામાં મદદ કરી. આત્મહત્યા કરવાનું વિચારતો હતો કપિલ શર્માએ 2017માં આત્મહત્યા કરવાનું વિચારવા લાગ્યો હતો. કપિલે આજતકને આપેલા ઇન્ટરવ્યૂમાં કહ્યું હતું કે, મેં આત્મહત્યા કરવાનું વિચાર્યું હતું. મને એવું લાગતું હતું કે મારી લાગણીઓ શેર કરવા માટે કોઈ નથી. હું જે જગ્યાએથી આવું છું ત્યાં માનસિક સ્વાસ્થ્ય જેવી કોઈ વસ્તુની ચર્ચા થતી નથી. મને નથી લાગતું કે હું આ તબક્કામાંથી પહેલી વાર પસાર થયો હતો. કદાચ, મને બાળપણમાં નિરાશા થઈ હશે, પણ કોઈએ તેની નોંધ નહીં લીધી હોય. દરિયામાં કુદી જવા માગતો હતો કપિલે કહ્યું હતું કે, તે એક એવો સમય હતો, જ્યારે તેને ડિપ્રેશનને કારણે એંગ્ઝાઈટિ એટેક આવવા લાગ્યા હતા. તેનો મિત્ર તેના સી ફેસિંગ ઘરે લઈ ગયો હતો, જેથી તે પોતાનું દુ:ખ ભૂલી શકે, પરંતુ દરિયાને જોયા પછી કપિલ તેમાં કૂદી પડવા તૈયાર થઈ ગયો હતો. કપિલે સુનીલ ગ્રોવર સાથેના પોતાના સંબંધો અંગે પણ સ્પષ્ટતા કરી હતી. તેણે કહ્યું હતું કે, ઓસ્ટ્રેલિયા પ્રવાસ દરમિયાન તેની અને સુનીલ વચ્ચે કંઈ થયું નહતું. સુનિલે કપિલને બીજા કોઈ પર ગુસ્સે થતો જોયો, ત્યારે તેણે તેને કહ્યું કે તેનું વર્તન બરાબર નથી. સારું લાગે તે માટે દારૂ પીવાનું શરૂ કર્યું કપિલે કહ્યું હતું, જ્યારે તમે નશામાં હોવ છો, ત્યારે તમે આત્મવિશ્વાસ ધરાવો છો, પરંતુ જ્યારે તમે શાંત હોવ છો, ત્યારે વાસ્તવિકતા તમારી સામે આવે છે. મારી ભૂલ એ હતી કે, હું પોતાને સારું અનુભવવા માટે દારૂ પીતો હતો. રાત સુધી તો ઠીક હતું, પણ મેં દિવસે પણ પીવાનું શરૂ કર્યું. મને સમજાતું નહોતું કે શું કરવું. તે સમયે ઘણા કાર્યક્રમો રદ કરવામાં આવ્યા હતા. શાહરૂખ ખાન અને અજય દેવગન જેવા સ્ટાર્સને કલાકો સુધી રાહ જોવી પડી અને પછી શૂટિંગ રદ કરવામાં આવ્યું કાર્યક્રમ ઉપરાંત કપિલ શર્માની નશાની હાલતને કારણે ઘણી વખત શૂટિંગ રદ કરવું પડ્યું હતું. ટાઈમ્સ ઓફ ઇન્ડિયાને આપેલા ઇન્ટરવ્યૂમાં કપિલને પૂછવામાં આવ્યું હતું કે, તેણે અજય દેવગન, શાહરૂખ ખાન જેવા સુપરસ્ટારને કલાકો સુધી રાહ જોવી પડી અને પછી છેલ્લી ઘડીએ શૂટિંગ રદ કર્યું. જેના કારણે સ્ટાર્સ ગુસ્સે થતા હતા. તેના જવાબમાં તેણે કહ્યું, હું તેમને કેવી રીતે રાહ જોવી શકું? કોઈ ક્યારેય મારા પર ગુસ્સે થયું નથી. એવું લાગતું હતું કે શૂટિંગ નહીં થાય, પછીથી મને ખૂબ જ ગિલ્ટ ફીલ થયું કપિલે કહ્યું હતું, હું ઈચ્છું તો પણ મારા શૂટિંગ માટે મોડું થઈ શકતું નથી. ફિલ્મ સ્ટાર્સ આવે તેના બે કલાક પહેલા મારે સેટ પર પહોંચવુંજ પડે, કારણ કે મારે પહેલા ત્યાં પહોંચીને મારી જાતને તૈયાર કરવી પડે. હું ૧૦ વાગ્યે સેટ પર પહોંચ્યો. શાહરૂખ ખાન એક વાગ્યે આવવાના હતા, મારી ગભરામણ વધવા લાગી. હું પોણા વાગ્યે જ સેટ પરથી નીકળી ગયો, કારણ કે મને લાગતું હતું કે શૂટિંગ શક્ય નહીં બને. ક્યારેક કામ કરવાનું મન નથી થતું, પણ લોકો આ સમજી શકતા નથી. શાહરૂખ ભાઈ સાથેનું શૂટિંગ રદ થયું, ત્યારે મને ખૂબ ગિલ્ટ ફીલ થયું. શાહરુખ ખાને કાઉન્સેલિંગ કર્યું કપિલ શર્માએ કહ્યું હતું કે, શૂટિંગ રદ થયાના ત્રણ-ચાર દિવસ પછી શાહરુખ ખાન મને મળ્યા હતા. તે ફિલ્મ સિટીમાં કંઈક શૂટિંગ કરવા આવ્યા હતા. એક કલાકાર તરીકે તે સમજી ગયા કે શું થઈ રહ્યું છે. છેવટે તેઓ એક સુપરસ્ટાર છે અને તેમણે ઇન્ડસ્ટ્રીમાં બધું જ જોયું છે. તેમણે મને તેમની કારમાં બોલાવ્યો, અમે એક કલાક સુધી બેસીને વાતો કરી. નકારાત્મક સમાચારથી હતાશ થઈને, તેણે પત્રકાર સાથે દુર્વ્યવહાર કર્યો કપિલ શર્મા જ્યારે ડિપ્રેશનમાંથી પસાર થઈ રહ્યો હતો, ત્યારે તેના વિરુદ્ધ સતત સમાચાર લખાઈ રહ્યા હતા. કપિલ નકારાત્મક સમાચારથી નારાજ હતો. તે સમયે તેણે એક એન્ટરટેઇનમેન્ટ વેબસાઇટના પત્રકારને ફોન કરીને ખરાબ રીતે દુર્વ્યવહાર કર્યો. કપિલ સાથેની વાતચીતનું સમગ્ર રેકોર્ડિંગ વેબસાઇટ પર મૂકવામાં આવ્યું હતું. તે રેકોર્ડિંગમાં, કપિલ કોલ પર પત્રકાર સાથે દુર્વ્યવહાર કરી રહ્યો હતો. કપિલે રેકોર્ડિંગમાં કહ્યું હતું કે, તમે મારા વિશે ખોટા સમાચાર કેમ પ્રકાશિત કરો છો? તમે ક્યારેય કેમ ન લખ્યું કે મેં યશ રાજની ફિલ્મ ‘બેંક ચોર’ ને નકારી કાઢી હતી અને તે ફિલ્મ ફ્લોપ થઈ ગઈ. યશ રાજની ફિલ્મથી ડેબ્યૂ કરવાનો હતો કપિલ શર્મા યશ રાજ બેનરની ફિલ્મ ‘બેંક ચોર’થી લીડ એક્ટર તરીકે ડેબ્યૂ કરવાનો હતો, પરંતુ તેણે આ ફિલ્મ છોડી દીધી. બાદમાં, તેણે અબ્બાસ-મસ્તાનના ડાયરેક્શનમાં બનેલી ફિલ્મ ‘કિસ કિસકો પ્યાર કરું’ થી ડેબ્યૂ કર્યું હતું. ‘કિસ કિસકો પ્યાર કરું 2’ માં જોવા મળશે ‘કિસ કિસકો પ્યાર કરું 2’નું નિર્દેશન અનુકલ્પ ગોસ્વામી કરી રહ્યા છે. જ્યારે તેનો પાછલો ભાગ ‘કિસ કિસકો પ્યાર કરું’ અબ્બાસ-મસ્તાને ડાયરેક્ટ હતો. અનુકલ્પ ગોસ્વામીએ ધેરાજ સરના સાથે મળીને આ ફિલ્મની વાર્તા લખી હતી. ‘કિસ કિસકો પ્યાર કરું 2’ની વાર્તા પણ અનુકલ્પ ગોસ્વામીએ લખી છે. આ ફિલ્મનું નિર્માણ અબ્બાસ-મસ્તાન, રતન જૈન અને ગણેશ જૈન સાથે મળીને કરી રહ્યા છે. હાલમાં, આ ફિલ્મ ક્યારે રિલીઝ થશે તે અંગે કોઈ માહિતી જાહેર કરવામાં આવી નથી.
