કેન્દ્રીય ગૃહમંત્રી અમિત શાહની જમ્મુ અને કાશ્મીર મુલાકાતનો આજે ત્રીજો અને છેલ્લો દિવસ છે. શાહ આજે શ્રીનગરના રાજભવનમાં બે મહત્વપૂર્ણ બેઠકો કરશે. પહેલી બેઠકમાં વિકાસ કાર્યોની સમીક્ષા કરશે. આ પછી રાજ્યની સુરક્ષા પરિસ્થિતિ પર ચર્ચા કરવામાં આવશે. શાહ મંગળવારે શ્રીનગરથી દિલ્હી પરત ફરશે. સોમવારે, તેમની મુલાકાતના બીજા દિવસે, શાહે કઠુઆમાં LoC અને BSF ચોકીની મુલાકાત લીધી. જ્યાં તેમણે હાલની સુરક્ષા વ્યવસ્થા અને પરિસ્થિતિનો તાગ મેળવ્યો. ત્યારબાદ તેઓ રાજભવનમાં શહીદોના પરિવારોને મળ્યા અને નિમણૂક પત્રોનું વિતરણ પણ કર્યું. અગાઉ પહેલા દિવસે 6 એપ્રિલ (રવિવાર) ના રોજ, શાહે ભાજપના ધારાસભ્યો અને અધિકારીઓ સાથે બેઠક યોજી હતી. આ બેઠક લગભગ બે કલાક ચાલી. આ દરમિયાન ગૃહમંત્રીએ કહ્યું- જમ્મુ અને કાશ્મીરને પૂર્ણ રાજ્યનો દરજ્જો આપવો એ અમારી નીતિનો ભાગ છે અને તેને યોગ્ય સમયે પુનઃસ્થાપિત કરવામાં આવશે. રાજ્યમાં નવી સરકાર બન્યા પછી અમિત શાહની આ પહેલી મુલાકાત છે. અમિત શાહની મુલાકાતની 3 તસવીર શાહે કહ્યું- થોડા વર્ષોમાં જવાનો ટેકનોલોજીથી સજ્જ થઈ જશે અમિત શાહે સોમવારે બોર્ડર સિક્યુરિટી ફોર્સ (BSF)ના જવાનો સાથે વાતચીત કરતા કહ્યું કે થોડા વર્ષોમાં, સમગ્ર ભારત-પાક અને ભારત-બાંગ્લાદેશ સરહદ પર તહેનાત સુરક્ષા દળના જવાનો ટેકનોલોજી દ્વારા સજ્જ કરવામાં આવશે. હાલમાં 26થી વધુ બહુવિધ ટેકનોલોજી-સંબંધિત ટ્રાયલ ચાલી રહ્યા છે, જેમાં એન્ટી-ડ્રોન ટેકનોલોજી, ટનલ આઇડેન્ટિફિકેશન ટેકનોલોજી અને ઇલેક્ટ્રોનિક સર્વેલન્સનો સમાવેશ થાય છે. રવિવારે, તેમની મુલાકાતના પહેલા દિવસે, શાહે ભાજપના ધારાસભ્યો અને અધિકારીઓ સાથે બેઠક યોજી હતી. આ દરમિયાન તેમણે કહ્યું- કેન્દ્ર સરકાર સુરક્ષા એજન્સીઓ સાથે મળીને આતંકવાદ અને ઘૂસણખોરી અંગે કડક રણનીતિ બનાવી રહી છે. શાહે કહ્યું- કેટલાક જિલ્લાઓના ઉપરના વિસ્તારોમાં આતંકવાદીઓની હાજરી અંગે જે ચિંતા સેવાઈ રહી છે. તે મામલે ઝડપી જવાબી કાર્યવાહી કરવામાં આવી રહી છે. સુરક્ષા દળો સતત કામ કરી રહ્યા છે. ટૂંક સમયમાં પરિસ્થિતિ કાબુમાં આવશે. રાજ્યસભામાં શાહે કહ્યું- મોદીએ કાશ્મીરમાં લોકશાહીનો પાયો નાખ્યો અમિત શાહે 19 માર્ચે રાજ્યસભામાં બજેટ સત્ર દરમિયાન ચર્ચામાં કહ્યું હતું કે 2004 થી 2014 દરમિયાન જમ્મુ અને કાશ્મીરમાં 7,217 આતંકવાદી ઘટનાઓ બની હતી, પરંતુ 2014 થી 2024 દરમિયાન તે ઘટીને 2,242 થઈ ગઈ. તેમણે કહ્યું કે છેલ્લા 10 વર્ષમાં નાગરિકોના મૃત્યુમાં 81% ઘટાડો થયો છે, સુરક્ષા કર્મચારીઓની શહાદતમાં 50% ઘટાડો થયો છે અને પથ્થરમારાની ઘટનાઓ હવે સંપૂર્ણપણે બંધ થઈ ગઈ છે. જ્યારે 2004માં 1,587 આતંકવાદી ઘટનાઓ બની હતી. શાહે કહ્યું- 2024માં ફક્ત 85 ઘટનાઓ બની હતી. 2004માં 733 નાગરિકો માર્યા ગયા હતા, જ્યારે 2024માં આ સંખ્યા ઘટીને 26 થઈ ગઈ. વડાપ્રધાન નરેન્દ્ર મોદીએ કાશ્મીરમાં લોકશાહીનો પાયો નાખ્યો છે અને હવે સરકાર આતંકવાદીઓને કડક અને સીધો જવાબ આપે છે. ગૃહમંત્રીએ વધુમાં કહ્યું કે જમ્મુ અને કાશ્મીરમાં વિપક્ષના 33 વર્ષના શાસન દરમિયાન ત્યાં સિનેમા હોલ પણ ખુલ્યા ન હતા. અમે 2019માં કલમ 370 હટાવી. G-20 મીટિંગમાં વિશ્વભરના રાજદ્વારીઓ ગયા હતા. અમે ત્યાં સફળતાપૂર્વક ચૂંટણીઓ કરાવી. એકપણ વખત ફાયરિંગ થયું નહોતું. રાજ્યસભામાં જમ્મુ-કાશ્મીર અંગે શાહની મોટી વાતો
