ચીને ઈંટનો જવાબ પથ્થરથી આપ્યો:104%ના ટેરિફના જવાબમાં અમેરિકા પર 84% ટેરિફ લગાવવાની જાહેરાત, આવતીકાલથી લાગુ

અમેરિકા દ્વારા લાદવામાં આવેલા 104% ટેરિફના જવાબમાં ચીને અમેરિકા પર 84% ટેરિફ લાદ્યો છે. આ ટેરિફ આવતીકાલથી લાગુ થશે. અગાઉ ચીને અમેરિકન માલ પર 34% ટેરિફ લાદ્યો હતો, જેમાં આજે 50%નો વધારો કરવામાં આવ્યો છે. એ જ સમયે અમેરિકાનો ચીન પરનો 104% ટેરિફ આજથી અમલમાં આવ્યો છે. આનો અર્થ એ થયો કે હવેથી અમેરિકામાં આવનારો ચીની માલ બમણાથી વધુ કિંમતે વેચાશે. ટ્રમ્પે કહ્યું- જે કોઈ ટેરિફની ટીકા કરે છે તે ઠગ અને છેતરપિંડી કરનાર
ટ્રમ્પે મંગળવારે વ્હાઇટ હાઉસમાં કહ્યું, “ટેરિફની ટીકા કરનારી કોઈપણ વ્યક્તિ ઠગ અને છેતરપિંડી કરનાર છે.” જ્યારે અમેરિકાએ 90 હજાર ફેક્ટરી ગુમાવી ત્યારે તેમણે એના વિશે વિચાર્યું નહોતું. ટ્રમ્પે કહ્યું હતું કે અમે ટેરિફથી ઘણા પૈસા કમાઈ રહ્યા છીએ. અમેરિકાને દરરોજ 2 અબજ ડોલર (17.2 હજાર કરોડ રૂપિયા) વધુ મળી રહ્યા છે. ઘણા દેશોએ અમને બધી રીતે લૂંટ્યા છે, હવે અમારો લૂંટવાનો વારો છે. મીડિયા રિપોર્ટ્સ અનુસાર, 2024 સુધી અમેરિકા દર વર્ષે ટેરિફથી 100 બિલિયન ડોલર કમાતું હતું. ટ્રમ્પે કહ્યું- હું મજૂરોનો રાષ્ટ્રપતિ
ટ્રમ્પે કહ્યું- મને ગર્વ છે કે હું આઉટસોર્સ(બહારના દેશમાં કામ કરનાર)નો નહીં, પણ મજૂરનો રાષ્ટ્રપતિ છું. હું એક એવો રાષ્ટ્રપતિ છું, જે વોલ સ્ટ્રીટ નહીં, પણ મેઇન સ્ટ્રીટ (સ્ટોર્સ, નાના વ્યવસાયો) માટે ઊભો છું. ટ્રમ્પે એમ પણ કહ્યું હતું કે કેટલાક લોકો કહે છે કે ટેરિફથી કિંમતો વધશે. આ બિલકુલ ખોટું છે. આ એક નાની પીડા છે. ચીન, યુરોપ, બધા અમારી સાથે વાત કરવા આવશે. તેઓ ટેરિફ દૂર કરશે, અમારો માલ ખરીદશે અને અહીં ફેક્ટરીઓ ખોલશે. યુએસ શેરબજારમાં અત્યારસુધીનો સૌથી મોટો ઘટાડો ટ્રમ્પે ટેરિફની જાહેરાત કર્યા પછી યુએસ સ્ટોક એક્સચેન્જમાં તીવ્ર ઘટાડો થયો છે. SP 500 કંપનીઓના શેરબજાર મૂલ્યમાં $5.8 ટ્રિલિયન (રૂ. 501 લાખ કરોડ)નો ઘટાડો થયો છે. LSEG ડેટા અનુસાર, 1957 માં બેન્ચમાર્ક ઇન્ડેક્સ રજૂ થયા પછી આ ચાર દિવસનો સૌથી મોટો ઘટાડો છે. SP 500 કંપનીઓમાં અમેરિકાની ટોચની 500 કંપનીનો સમાવેશ થાય છે. ટ્રમ્પે ફેબ્રુઆરીમાં ચીન પર 10% ટેરિફ લાદ્યો હતો. ત્યાર બાદ તેઓએ માર્ચમાં ફરીથી 10% ટેરિફ લાદ્યો. આ મહિનાની શરૂઆતમાં ટ્રમ્પે ચીન પર વધુ 34% ટેરિફની જાહેરાત કરી હતી. આના જવાબમાં ચીને પણ અમેરિકા પર 34% ટેરિફ લાદ્યો. ટ્રમ્પે સોમવારે કહ્યું હતું કે જો ચીન અમેરિકા પર લાદવામાં આવેલો 34% ટેરિફ પાછો નહીં ખેંચે તો બુધવારથી તેને માર્ચમાં લાદવામાં આવેલા 20% ટેરિફ અને 2 એપ્રિલે 34% ટેરિફ ઉપરાંત 50% વધારાના ટેરિફનો સામનો કરવો પડશે. ચીને કહ્યું હતું કે અમે વેપારયુદ્ધ માટે તૈયાર ટ્રમ્પના નિવેદન પર ચીને કહ્યું હતું કે અમેરિકા અમારા પર લાદવામાં આવેલા ટેરિફમાં વધુ વધારો કરવાની ધમકી આપીને એક પછી એક ભૂલો કરી રહ્યું છે. આ ધમકી અમેરિકાના બ્લેકમેઇલિંગ વલણને છતી કરે છે. ચીન આ ક્યારેય સ્વીકારશે નહીં. જો અમેરિકા પોતાની ઇચ્છા પ્રમાણે ચાલવાનો આગ્રહ રાખે છે, તો ચીન પણ અંત સુધી લડશે. રવિવારે ચીને વિશ્વને સ્પષ્ટ સંદેશ આપ્યો- ‘જો વેપારયુદ્ધ થાય છે તો ચીન સંપૂર્ણપણે તૈયાર છે- અને એમાંથી વધુ મજબૂત બનીને બહાર આવશે.’ ચીની કોમ્યુનિસ્ટ પાર્ટીના મુખપત્ર ધ પીપલ્સ ડેઇલીએ રવિવારે એક ટિપ્પણીમાં લખ્યું: “યુએસ ટેરિફની ચોક્કસપણે અસર થશે, પરંતુ ‘આકાશ તૂટી નહીં પડે.’ ટ્રમ્પે અમેરિકામાં ઉત્પાદન વધારવા માટે રેસિપ્રોકલ ટેરિફ લગાવ્યો
અમેરિકાના રાષ્ટ્રપતિ ડોનાલ્ડ ટ્રમ્પે 2 એપ્રિલે અન્ય દેશો પર પારસ્પરિક કર લાદવાની જાહેરાત કરી હતી. આમાં ભારત પર 26% ટેરિફ લાદવાની જાહેરાત કરવામાં આવી હતી. આ દરમિયાન તેમણે કહ્યું હતું કે ભારત ખૂબ જ કડક છે. મોદી મારા સારા મિત્ર છે, પણ તેઓ અમારી સાથે યોગ્ય વર્તન નથી કરી રહ્યા. ભારત ઉપરાંત ચીન પર 34%, યુરોપિયન યુનિયન પર 20%, દક્ષિણ કોરિયા પર 25%, જાપાન પર 24%, વિયેતનામ પર 46% અને તાઇવાન પર 32% ટેરિફ લાદવામાં આવશે. અમેરિકાએ લગભગ 60 દેશ પર તેમના ટેરિફની સરખામણીમાં અડધો ટેરિફ લાદવાનો નિર્ણય લીધો છે.