વડોદરાના જવાહરનગર પોલીસ હદ વિસ્તારમાં આવેલા ધનોરા ગામ પાસે આવેલી GIPCL(ગુજરાત ઇન્ડસ્ટ્રીઝ પાવર કંપની લિ.) કંપનીને બોમ્બથી ઉડાવી દેવાની ધમકી ભર્યા મેલને લઈ દોડધામ મચી ગઈ હતી. આ અંગેની જાણ વડોદરા શહેર પોલીસને કરતાં ઉચ્ચ અધિકારીઓ સહિત વિવિધ તપાસ એજન્સીઓ ઘટનાસ્થળે પહોંચી ત્રણ કલાક સુધી સર્ચ કર્યું હતું. કોઈ વાંધાજનક વસ્તુ ન મળતાં પોલીસ અને કર્મચારીઓએ રાહતનો શ્વાસ લીધો હતો. હાલ મેલ મોકલનારની તપાસ હાથ ધરવામાં આવી છે. કંપનીના એમડીને શ્રીનિવાસનના નામથી મેલ કરાયો
મહત્ત્વની બાબતે છે કે આ કંપનીમાં 40 કર્મચારી ફરજ બજાવે છે. આ ઘટનાને લઇ કંપનીના એમડીને ધમકીભર્યા મેલ મળ્યા બાદ તેમણે પોલીસને જાણ કરી હતી અને તાત્કાલિક પોલીસે કંપનીને સર્ચ કરવાની કામગીરી હાથ ધરી હતી. મેલ અંગે પોલીસને જાણ કરાતાં બીડીડીએસ સહિતની ટીમો કંપની પર પહોંચી હતી અને સર્ચ હાથ ધર્યું હતું, જોકે સુરક્ષા એજન્સીઓ દ્વારા ત્રણ કલાકના સર્ચ બાદ કોઈપણ વાંધાજનક વસ્તુ મળી નહોતી, જેથી પોલીસ અને કંપનીના કર્મચારીઓએ હાશકારો અનુભવ્યો છે. મેલ ક્યાંથી આવ્યો એની તપાસ શરૂ
આ અંગે કંપનીના સિક્યોરિટી હેડ દ્વારા જવાહનગર પોલીસ મથકમાં જાણવાજોગ ફરિયાદ દાખલ કરાઈ છે અને એના આધારે તપાસ કરવામાં આવશે કે આ મેલ ક્યાંથી આવ્યો છે. આ ફેંક ઇ-મેલને લઈ પોલીસે તેના આઇપી એડ્રેસ અંતર્ગત વધુ કાર્યવાહી હાથ ધરી છે. આ અંગે ડીસીપી જે. સી. કોઠિયાએ જણાવ્યું હતું કે જે મેલ મળ્યો છે એ જીઆઇપીસીએલના એમડીને મળ્યો છે. મેલની અંદર બોમ્બ મૂક્યો હોવાની માહિતી દર્શાવવામાં આવી છે. આ અંગેની પોલીસની જાણ થતાં એસઓજી, બીડીડીએસની ટીમ, લોકલ ટીમ, ડીસીપી ક્રાઈમ, એસઓજી ટીમ સહિતની ટીમો દ્વારા સર્ચ કરવામાં આવ્યું છે, પરંતુ હાલ સુધીમાં કોઈ વાંધાજનક વસ્તુ મળી નથી. આ મેલ ક્યાંથી આવ્યો છે એ શોધવાનું કામ ચાલી રહ્યું છે.
વડોદરાની GIPCLને બોમ્બથી ઉડાવી દેવાની ધમકી:કંપનીના MDને મેલ મળતાં દોડધામ, ત્રણ કલાકની શોધખોળ બાદ કોઈ શંકાસ્પદ વસ્તુ ન મળતાં રાહત
