પદ્મિનીબા વાળા ફરી વિવાદમાં:ગોંડલમાં પદ્મિનીબા અને તેમના પુત્ર સહિત 5 સામે હનીટ્રેપમાં ફસાવવાની પોલીસ ફરિયાદ

રાજ્યમાં લોકસભા ચૂંટણી પહેલા થયેલા ક્ષત્રિય આંદોલનથી જાણીતા બનેલા અને અવારનવાર ચર્ચામાં રહેતા અને વિવાદમાં રહેતા ક્ષત્રિય સમાજના મહિલા નેતા પદ્મિનીબા વાળા ફરી એક વિવાદમાં સપડાયા છે. ગોંડલમાં પદ્મિનીબા વાળા, તેમના પુત્ર અને અન્ય 3 એમ કુલ 5 લોકો સામે હનીટ્રેપમાં ફસાવવાની પોલીસ ફરિયાદ દાખલ થઇ છે. ગોંડલના જેતપુર રોડ પર રહેતા 60 વર્ષીય રમેશભાઈ ત્રિકમભાઈ અમરેલીયા નામના વ્યક્તિએ આ પોલીસ ફરિયાદ નોંધાવી છે. કોની-કોની સામે પોલીસ ફરિયાદ નોંધાઈ? યુવતીએ નંબર લઈને વીડિયો કોલ કર્યો અને કપડાં ઉતાર્યા
ફરિયાદી રમેશભાઈ ત્રિકમભાઈ અમરેલીયાએ પોલીસ ફરિયાદમાં જણાવ્યાં અનુસાર 15 દિવસ પહેલા તેજલ નામની યુવતી તેમના ઘર પાસે આવી હતી અને મંદિરનું સરનામું પૂછ્યા બાદ તેમનો મોબાઈલ નંબર લીધો હતો. બાદમાં ફોન કરીને કહ્યું હતું કે મારો પતિ મારી ગયો છે અને મારા ઘરમાં કોઈ નથી. તમે મારુ 7-8 લાખનું દેણું ભરી દો, તમે કહો એમ કરવા તૈયાર છું અને સંબંધ બાંધવા પણ તૈયાર છું. આવું કહીને તે યુવતીએ વિડીયો કોલમાં ટીશર્ટ કાઢી નાખ્યું હતું અને બાદમાં ફોન કટ કરી નાખ્યો હતો. બીજા દિવસે ફરિયાદીને ફોન આવેલો કે તેજલ વિશે વાત કરવી છે રાજકોટ ઓફિસ આવો. બાદમાં બે યુવાનો તેમના ઘરે આવ્યા અને કહ્યું કે પદ્મિનીબા આવ્યા છે તેમને તમારી સાથે તેજલ અંગે વાત કરવી છે, તો બેઠક ગોઠવો. ફરિયાદીના જણાવ્યાં અનુસાર પદ્મિનીબા વાળા, તેજલ નામની યુવતી, પદ્મિનીબાનો પુત્ર અને અન્ય બે એમ 5 લોકો તેમના ઘરમાં જબરદસ્તી કરીને ઘુસી ગયા હતા. “તને રોડ વચ્ચે કપડાં કાઢીને મારીશ અને હર્ષ સંઘવીને કહીને તારા ઘર પર બુલડોઝર ફેરવડાવી દઈશ”
ફરિયાદીએ ફરિયાદમાં જણાવ્યું છે કે પદ્મિનીબાએ તેમના ઘરમાં ઘૂસીને પરિવારના સભ્યો સામે જોર જોરથી બૂમો પાડી ખોટા આરોપ લગાવ્યા અને કહ્યું કે તને રોડ વચ્ચે કપડાં કાઢીને મારીશ અને હર્ષ સંઘવીને કહીને તારા ઘર પર બુલડોઝર ફેરવડાવી દઈશ. રાજકોટ આવી માફીનો વીડિયો, માફીપત્ર અને 7-8 લાખ આપી સેટલમેન્ટ કરવા ધમકાવ્યાં
ફરિયાદીના જણાવ્યા અનુસાર પદ્મિનીબા તેમને ધમકાવી રહ્યાં હતા ત્યારે તેમના મિત્ર વનરાજભાઈ આવી જતા પદ્મિનીબાએ ફરિયાદીને રાજકોટ આવી માફીનો વીડિયો, માફીપત્ર અને સેટલમેન્ટ કરવા ધમકી આપી હતી. સેટલમેન્ટ તરીકે તેજલનું 7-8 લાખનું દેવું ભરવા ધમકી આપી હતી. આ દરમિયાન તેજલ નામની યુવતીએ પોતાના પર્સમાંથી દવા કાઢીને પીવાનું તરકટ પણ કર્યું હતું. આ વ્યક્તિ આ યુવતીનું શોષણ કરવા માંગતો હતો : પદ્મિનીબા
ગોંડલ પોલીસ સ્ટેશન બહાર પદ્મિનીબા વાળાએ પોતાના પર લાગેલા આરોપો અંગે કહ્યું, “આ વ્યક્તિનો ઈરાદો આ યુવતીનું શોષણ કરવાનો હતો અને અમે તેને ખુલ્લો પાડવા ગોંડલ આવ્યાં હતા. આ વ્યક્તિ અને તેના પરિવારજનોએ અમારી માફી પણ માંગી તે તમે જતું કરો. તેમણે માફી પણ માંગી કે મારી કોઈ દિવસ ભૂલ થશે નહીં. અમે એમને ન્યુઝમાં આવી માફી માંગવા કહ્યું. મારા ભેગા બે ત્રણ દીકરાઓ આવ્યા હતા ખાસ કરીને મારો દીકરો તો મારી સાથે જ હોય છે તો મારા દીકરા ઉપર શેની FIR? અમે ત્યાં હતા અમે ત્યાં બેઠા હતા નથી કોઈ મારકૂટ કરી એવું કોઈ એવીડન્સ નથી કે અમારી ઉપર જે ફરિયાદ થઈ શકે, તો આ ક્યાંનો ન્યાય છે? ન્યાય દેવડાવે છે એની ઉપર જો તમે ચડી બેસો અમારી સાથે પણ જો આવું થતું હોય તો આવી બહેનો દીકરીઓ કોની પાસે જશે એ મારે પ્રશ્ન પૂછવો છે અને અત્યારે કેટલા બધા રેપ કેસ થાય છે ન્યાય મળે છે દીકરીઓને? ખોટી રીતે મારી પર ફરિયાદ કરેલી છે તો હવે મારે કોની પાસે ન્યાય લેવા જવાનો? : પદ્મિનીબા
પદ્મિનીબાએ કહ્યું, “ હું એક સામાજિક આગેવાન તરીકે કોઈના ઘરે ન જઈ શકું? શાંતિથી વાત ચર્ચા ન કરી શકું? અમે કેટલા તો સમાધાન કરાવેલા છે એટલે ખોટી રીતે મારી પર ફરિયાદ કરેલી છે તો હવે મારે કોની પાસે ન્યાય લેવા જવાનો ? પૈસાની માંગણી કોઈએ કરેલી નથી એ લોકો પાસે કોઈ એવીડન્સ તો હશે ને એમનો ફોન પણ ચાલુ હતો અને મેં કીધું તમારો ફોન પણ ચાલુ રાખો અને અમારો ફોન પણ ચાલુ રાખીએ તો એ લોકોને કહો કે પુરાવા આપે એક શબ્દ પણ એક રૂપિયાનો નીકળ્યો હોય તો. આમની પાછળ બીજા કોઈ તત્વો કામ કરી રહ્યા છે”